44‑гадовая спявачка заключыла кантракт з незалежнай музычнай кампаніяй Primary Wave, якая набыла яе каталог за 200 млн долараў. Здзелка была заключана ў снежні мінулага года, паведамляе Бі-бі-сі.
Primary Wave не адказала на просьбу Бі-бі-сі пракаментаваць інфармацыю аб продажы, прадстаўнікі Спірс таксама адмовіліся даць каментары.
У студзені 2024 года Спірс заявіла, што «ніколі не вернецца ў музычную індустрыю». Апошні раз яна выпускала новую музыку ў жніўні 2022 года: песню Hold Me Closer, запісаную ў дуэце з Элтанам Джонам.
Гэта быў яе першы рэліз пасля таго, як у канцы 2021 года суд спыніў апекунства над спявачкай, якое працягвалася на працягу 13 гадоў.
Брытні Спірс — адна з самых паспяховых выканаўцаў апошніх дзесяцігоддзяў, у свеце было прададзена больш за 150 млн яе запісаў. Музычны каталог спявачкі складаецца з дзевяці студыйных альбомаў, першы з якіх выйшаў у 1999 годзе.
З 2008‑га па 2021 год жыццём і ўсімі актывамі Спірс кіраваў яе бацька. Гэта было звязана з рашэннем суда, па якім яна была прызнана недзеяздольнай. Апекунства было адменена паводле пазову спявачкі, задаволенага судом у Лос-Анджэлесе.
У 2023 годзе Спірс апублікавала мемуары пад назвай «Жанчына ўва мне» (The Woman in Me), у якіх яна апісвае сваё жыццё ва ўмовах апекі.
У мінулым Primary Wave таксама набыла пасмяротныя правы на музыку такіх музыкаў, як Notorious BIG, Прынца і Уітні Х'юстан. Гэтая кампанія была заснавана 20 гадоў таму, калі яе заснавальнік Лорэнс Местэл выкупіў 50% правоў на музыку групы Nirvana, якія належалі Курту Кабэйну.
За апошнія гады правы на свой музычны каталог прадалі многія вядомыя музыканты, у тым ліку Брус Спрынгсцін (яго здзелка з Sony на 500 млн долараў была заключана ў 2021 годзе) і Джасцін Бібер (у 2023 годзе ён прадаў свае песні кампаніі Hipgnosis Songs Capital за 200 млн долараў).
Акрамя таго, паведамлялася, што брытанскі музыкант Стынг прадаў свае правы гуказапісвальнай кампаніі Universal Music Group за 250 млн долараў.
Некаторыя іншыя здзелкі па набыцці музычных правоў:
- Дэвід Боўі — $250 млн (Warner Music Group)
- Боб Дылан — $ 200‑450 млн (Universal Music Group)
- Пол Сайман — $250 млн (Sony Music)
- Ніл Янг — $150 млн (інвестфонд Hipgnosis Songs)
- Red Hot Chili Peppers — $140 млн (Hipgnosis Songs)
- Дэвід Гета — $100 млн (Warner Music Group)
Для музыкаў і іх спадчыннікаў продаж правоў на музыку з'яўляецца закладам фінансавай стабільнасці, а для буйных рэкорд-лэйблаў і інвестыцыйных фондаў — магчымасцю абгрунтаваць свой высокі рынкавы кошт і забяспечыць прыбытак за кошт стрымінгу і ліцэнзавання музыкі для розных праектаў.
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком23
Каментары
[Зрэдагавана]