Кая Калас — беларусам: Вы можаце разлічваць на Еўрапейскі саюз. Большасць краін ЕС выйшлі з халоднага аўтарытарнага мінулага
Вярхоўны прадстаўнік Еўрапейскага саюза па замежных справах і палітыцы бяспекі Кая Калас акрэсліла падыход ЕС да Беларусі на канферэнцыі «Беларусь: закладаючы падмурак для дэмакратычных перамен» у Еўрапарламенце.
Кая Калас адзначыла, што стратэгія ЕС уключае падтрымку народа Беларусі і адначасова ізаляцыю рэжыму, які дапамагае Расіі весці вайну ва Украіне.
«За апошнія 100 гадоў Расія ўварвалася прынамсі ў 19 краін, у некаторыя — да трох ці чатырох разоў. Ніводная з гэтых 19 краін ніколі не ўрывалася ў Расію і не нападала на яе. І хто ж памагаты Расіі ў гэтай справе? Беларусь. (…)
Беларусь не толькі дапамагае Расіі наўпрост і ўскосна, яна таксама ўдзельнічае ў шэрагу гібрыдных інцыдэнтаў і правакацый, якія пагражаюць бяспецы дзяржаў — членаў ЕС. Сюды ўваходзяць парушэнні паветранай прасторы, інцыдэнты з беспілотнікамі і паветранымі шарамі, замежны згубны ўплыў, а таксама працяг арганізацыі міграцыйнага ціску і кантрабанды праз межы ЕС. У выніку мы працуем над пашырэннем нашага санкцыйнага рэжыму.
Філосафу і дыпламату часоў Французскай рэвалюцыі, Жазэфу дэ Местру, часта прыпісваюць выраз: «Кожная краіна мае такі ўрад, якога заслугоўвае». Але я не магу з гэтым пагадзіцца. Гэта не насельніцтва Беларусі падтрымлівае гэтую зламысную дзейнасць рэжыму. І таму мы працягваем нашу палітыку падтрымкі народа Беларусі».
Нагадаем, сёння стала вядома, што Еўрасаюз выдасць 30 мільёнаў еўра «на падтрымку беларускага народа» ў 2026 годзе.
«Вашае змаганне доўгае і цяжкае, але яно не марнае, — звярнулася Кая Калас. — Аўтарытарныя рэжымы, якія абапіраюцца на страх, а не на згоду, заўсёды больш крохкія, чым здаецца. Мы ведаем гэта з нашай уласнай гісторыі і досведу. Большасць дзяржаў — членаў ЕС выйшлі з халоднага аўтарытарнага мінулага.
Так што вы можаце разлічваць на Еўрапейскі саюз. Мы з вамі, не сімвалічна, а вельмі канкрэтна. З ціскам, калі гэта неабходна, з абаронай, калі трэба, з дапамогай, калі і дзе гэта мае значэнне. Мы падтрымаем будучы дэмакратычны пераход пад кіраўніцтвам беларусаў, калі ўмовы дазволяць, у тым ліку фінансавай і тэхнічнай падтрымкай да 3 мільярдаў еўра, як вырашылі нашы дзяржавы-чальцы летась.
Мы бачым вас, мы верым у вас і верым, што праца, якую вы пачалі, каб пабудаваць асновы дэмакратычных пераўтварэнняў, паўплывае на Беларусь заўтрашняга дня».
Калас таксама адзначыла, што яны ўдзячныя ЗША за ўдзел у гуманітарным трэку па вызваленні беларускіх палітвязняў, але заўважыла, што «вызваленні не азначаюць дэмантаж рэпрэсіўнай сістэмы, якая працягвае штодзённа наганяць страх у вашыя сэрцы».
На канферэнцыі, якая праходзіць у Еўрапейскім парламенце, абмяркоўваюцца правы чалавека, будучая пераходная рэформа ў Беларусі. Удзел у мерапрыемстве прымаюць еўрапейскія і беларускія палітыкі, міжнародныя эксперты.
Тэму пераходнага перыяду і падрыхтоўкі новага заканадаўства ў сваім выступе закранула Святлана Ціханоўская:
«Ідэя новага заканадаўства простая: стабілізаваць дэмакратыю, ліквідаваць карупцыю, запусціць нанова сістэму правасуддзя, якая б служыла людзям, а не ўраду, і наблізіць Беларусь да Еўропы. Каб гарантаваць, што дыктатура ніколі не паўторыцца ў Беларусі».
У мінскім метро праходзяць выпрабаванні новыя цягнікі ФОТЫ2
Каментары
> Вы можаце разлічваць на Еўрапейскі саюз
> Мы з вамі, не сімвалічна, а вельмі канкрэтна
> Мы бачым вас, мы верым у вас
...
> У выніку мы працуем над пашырэннем нашага санкцыйнага рэжыму.
Вялiкi дзякуй спадарыне Калас!
Спадзяюся, спадарыня Святлана вiтае палiтыку ЕС. А то што-та даўно не было афiцыйных заяў офiса на гэты конт.