У Ружанах археолагі знайшлі фрагменты падмурка будынка часоў Льва Сапегі
Фрагменты старажытнага падмурка, які можа належаць будынкам часоў Льва Сапегі, былі знойдзены ў гарадскім пасёлку Ружаны Пружанскага раёна. Пра гэта паведаміла дырэктарка Ружанскага палацавага комплексу Алена Кубарка, піша БелТА.
Падчас чарговага этапу рэстаўрацыі, звязанай з пракладкай камунікацый да тэатральнага корпуса, рабочыя натрапілі на старажытную муроўку. Пасля агляду археолагі прыйшлі да высновы, што выяўленыя фрагменты, верагодна, з’яўляюцца рэшткамі аднаго з будынкаў, якія існавалі ў час, калі маёнткам валодаў Леў Сапега.
Замак у Ружанах Сапега пачаў будаваць у 1602 годзе. Паводле гістарычных звестак, побач з ім знаходзіліся тры дамы — вялікі, малы і сярэдні. Знойдзены падмурак можа належаць аднаму з іх.
«Гэта ўнікальная знаходка, — адзначыла Алена Кубарка. — Раней мы дакладна не ведалі, дзе размяшчаўся сядзібны комплекс і якія межы ён меў. Цяпер становіцца ясней, наколькі вялікім быў маёнтак. Усё сведчыць пра тое, што Ружаны ў асноўным знаходзіліся каля падножжа замка».
Рэстаўрацыя Ружанскага палацавага комплексу вядзецца з 2008 года. За гэты час былі адноўленыя цэнтральная ўязная брама, бакавыя флігелі, у якіх створаны музей, і паўночна-ўсходняя аркада. Завершаныя вонкавыя працы па рэстаўрацыі двухпавярховага Усходняга (тэатральнага) корпуса. У будынку плануецца размясціць музейныя залы, фондасховішча, а таксама гатэль і кавярню.
Леў Сапега (1557-1633) — адзін з найбольш выдатных дзяржаўных дзеячаў Вялікага Княства Літоўскага. Ён быў канцлерам і вялікім гетманам, адным з самых багатых і ўплывовых магнатаў, а таксама вядомым мецэнатам. З яго імем сярод іншага звязваецца прыняцце трэцяга Статута ВКЛ 1588 года — вяршыні прававой думкі гэтай дзяржавы.
За забойства чалавека ў ІЧУ Барысава арыштавалі двух зэкаў-рэцыдывістаў і 26‑гадовага міліцыянера Кляшчонка8
Каментары