Перадкалядная бітва гандлёвых цэнтраў: Dana Mall звяла «жывую» Снежную каралеву ў Galleria Minsk
Мінскія гандлёвыя цэнтры традыцыйна спаборнічаюць у маштабнасці навагодняга афармлення. Але сёлета канкурэнцыя выйшла за межы простага дэкору. Пакуль адзін гандлёвы цэнтр неасцярожна выгнаў жывы сімвал свайго свята, другі скарыстаўся момантам і атрымаў чарговую порцыю народнай любові.
Што адбылося ў Galleria Minsk?
У гэтым сезоне Galleria Minsk зрабіла стаўку на класіку і маштаб. Увесь атрыум заняла гіганцкая інсталяцыя: 23‑метровая Снежная каралева на ледзяным троне, маленькі Кай, які складае слова «Вечнасць», і адважная Герда, якая ляціць на алені яму на дапамогу. Вобразы былі натхнёныя класічным савецкім мультфільмам 1957 года, які лічыцца адной з найлепшых экранізацый твора Ханса Крысціяна Андэрсана.
Блогерка Насцюшка (anastasia_kerus) вырашыла падтрымаць тэматыку і зрабіла касплэй на Снежную каралеву. У казачным вобразе, які вельмі дакладна паўтарае выгляд велізарнай скульптуры ў гандлёвым цэнтры, яна завітала ў «Галерэю», каб паздымацца на фоне крыніцы свайго натхнення для ўласнага тыктока.
Аднак ахове гандлёвага цэнтра ініцыятыва не спадабалася. Праз 30—40 хвілін супрацоўнікі падышлі да блогеркі і папрасілі яе пакінуць памяшканне.
«Нам сказалі: рабяты, выходзьце, вы збіраеце натоўп. Нельга збіраць натоўп, таму ўсе, хто хоча нейкае такое відэа — звяртаемся на інфалінію маркетынгавага агенцтва і там атрымліваем дазвол», — расказала ў сваім тыктоку Насцюшка.
Пазней дзяўчына выпусціла некалькі ўдакладненняў, падкрэсліўшы, што яе ніхто груба не выганяў і скандалу яна раздзімаць не хоча:
«Нас настойліва папрасілі сысці праз скопішча людзей. Ніхто не абураецца і не негатывіць».
Блогерка патлумачыла, што спачатку ахоўнік дазволіў здымку, калі даведаўся, што яна некамерцыйная, але пазней падышоў другі супрацоўнік і запатрабаваў узгаднення з аддзелам маркетынгу, супрацоўнікаў якога ўжо не было на месцы.
Нягледзячы на прымірэнчы тон блогеркі, у каментарах людзі былі абураныя тым, што «Галерэя» адмовілася ад бясплатнай рэкламы і свята для дзяцей.
«Чаму вам не прапанавалі супрацоўніцтва? Гэта ж наадварот крута», — пішуць у каментарах.
«Галерэя выгнала жывую казку і абясцэніла сябе».
Ход канкурэнтаў
Гэтай сітуацыяй імгненна скарыстаўся прамы канкурэнт — гандлёвы цэнтр Dana Mall на Усходзе. Гэты гандлёвы цэнтр сёлета абраў зусім іншую стылістыку — беларускі калядны кірмаш з Зюзем, механічнымі лялькамі ў народных строях, бутафорскай нацыянальнай кухняй і батлейкай. Але знайшлося месца і для выгнанай Снежнай каралевы.
Сёння блогерка апублікавала відэа з каляднага кірмаша ў Dana Mall з подпісам: «Сёння прыехалі паглядзець навагоднюю лакацыю ў Dana Mall. Дзякуй за цёплы прыём!»
Афіцыйны акаўнт Dana Mall у ТыкТоку не прымусіў сябе чакаць, напісаўшы, што дзяўчыну былі радыя бачыць у гандлёвым цэнтры і шукалі аж з «чорнай пятніцы» — тым самым паставіўшы кропку ў гэтай маркетынгавай бітве.
Атрымалася іранічная сітуацыя: Снежная каралева, якая павінна была панаваць у ледзяным царстве «Галерэі», знайшла сабе месца на ўтульным беларускім кірмашы ў канкурэнтаў.
«Наша Нiва» — бастыён беларушчыны
ПАДТРЫМАЦЬ
За забойства чалавека ў ІЧУ Барысава арыштавалі двух зэкаў-рэцыдывістаў і 26‑гадовага міліцыянера Кляшчонка7
Каментары