Разам з былым ваяром Палка Каліноўскага Васілём Верамейчыкам, якога В'етнам выдаў Беларусі, судзілі Васіля Грачыху. Мужчыну затрымалі вясной пры невядомых абставінах, піша «Вясна».
Прапагандысты паказалі, як яго вядуць па балоцістай мясцовасці некалькі супрацоўнікаў КДБ з аўтаматамі. Агулам каліноўцаў абвінавацілі паводле дванаццаці артыкулаў Крымінальнага кодэкса. У выніку Васіля Грачыху асудзілі да пяці гадоў калоніі, а Васілю Верамейчыку прызначылі 13 гадоў калоніі.
Пра затрыманне былога каліноўца Васіля Грачыхі стала вядома з выпуску навінаў на дзяржаўным тэлебачанні «Беларусь 1» 5 мая 2025 года. У прапагандысцкім роліку паказалі, як супрацоўнікі КДБ з аўтаматамі вялі мужчыну па балоцістай мясцовасці, а потым перавозілі верталётам. Падчас транспарціроўкі ён быў з чорным мяшком на галаве, а рукі былі счэпленыя спераду пластыкавай сцяжкай. Каліноўца даставілі верталётам на аэрадром, дзе перад пасадкай у мікрааўтобус яго паказальна на камеру апытваў Канстанцін Бычак. Пасля кадраў затрымання ў роліку паказалі відэа з мірных акцый пратэсту ў 2020 годзе.
Паводле інфармацыі прэс-службы Палка Каліноўскага, Васіль далучыўся да іх у маі 2022 года, але пакінуў падраздзяленне ўжо ў чэрвені таго ж года па ўласным жаданні.
Як стала вядома праваабаронцам, Васіля Верамейчыка і Васіля Грачыху судзілі разам.
Іх абвінавачвалі паводле 12 артыкулаў Крымінальнага кодэкса: ч. 1 і 2 арт. 285 (стварэнне злачыннай арганізацыі альбо ўдзел у ёй); арт. 290‑3 (праходжанне навучання ці іншай падрыхтоўкі для ўдзелу ў тэрарыстычнай дзейнасці); ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх); ч. 1 арт. 357 (змова ці іншыя дзеянні, здзейсненыя з мэтай захопу дзяржаўнай улады); ч. 1 і 3 арт. 361‑1 (стварэнне экстрэмісцкага фармавання альбо ўдзел у ім); ч. 2 арт. 361‑3 (удзел на тэрыторыі замежнай дзяржавы ва ўзброеным канфлікце); ч. 1 і 2 арт. 361‑4 (садзейнічанне экстрэмісцкай дзейнасці); арт. 364 (гвалт альбо пагроза прымянення гвалту ў дачыненні да супрацоўніка органаў унутраных спраў); ч. 1 арт. 368 (абраза Лукашэнкі); арт. 369 (абраза прадстаўніка ўлады); арт. 389 (пагроза ў адносінах да суддзі); арт. 391 (пагроза суддзі).
Васіль Верамейчык і Васіль Грачыха ўтрымліваюцца ў СІЗА-1 у Калядзічах.
Цяпер чытаюць
Ціханоўская і Зяленскі ўпершыню правялі сустрэчу. Зяленскі запрасіў Святлану ў Кіеў8
Каментары