Беларускі фермер паказаў, як збірае ўраджай. Народ у захапленні — відэа збіраюць мільёны праглядаў
Пад некаторымі відэа шмат каментароў на англійскай.
Малады фермер з Брэсцкай вобласці Мікалай Тарасевіч паказвае ў тыктоку сваю працу. Відэа, як ён з дапамогай камбайна збірае ўраджай морквы, набрала больш за 42 мільёны праглядаў і больш за 13 тысяч каментароў. Адметна, што самыя папулярныя — на англійскай мове.
Комбайн копает.) без проблем))
На відэа бачна, як камбайн акуратна выдзірае моркву з зямлі, аббівае рэшткі грунту, абрублівае зялёны маркоўнік і пасля выкідае ўраджай на зямлю. Праца тэхнікі заварожвае.
Многія ў каментарах пыталіся, чаму морква пасля збору застаецца на зямлі.
«Гэта было сапраўды эфектыўна, пакуль яны проста не кінулі яе на зямлю», — напісала карыстальніца тыктоку.
«А чаго на зямлю? Чаму не ў кузаў?» — спытаў яшчэ адзін каментатар.
Іншыя патлумачылі ім, што моркве трэба прасохнуць, а пасля яе збярэ іншая тэхніка.
Сярод многіх рускамоўных каментатараў гэты ролік выклікаў успаміны, як яны ў студэнцкія часы ездзілі збіраць ураджай у палях. Адныя з радасцю згадваюць такія прыгоды, а іншыя называюць жахам.
У іншым папулярным роліку фермер паказвае, як камбайн збірае буракі. Відэа набрала 3,2 мільёна праглядаў.
Интересно))
У каментарах многія нахвальваюць тэхніку, якая так хутка і асцярожна збірае ўраджай буракоў.
«Калісьці мы гектары рвалі рукамі на палях, дапамагалі бацькам. Цяпер гэта ўсё наколькі спрошчана», — пішуць.
«Малайцы, канструктары, добрую машыну стварылі. Усё ідзе як па масле», — хваляць.
Што гэта за тэхніка і колькі можа каштаваць?
Многія гадаюць, чыёй вытворчасці цуда-тэхніка, на якой працуе фермер. Частка каментатараў мяркуе, што гэта «Гомсельмаш», а іншыя, што гэта кітайскія камбайны.
На справе гэта тэхніка нідэрландскай фірмы Keulmac, фірмовы шыльдзік можна разглядзець на відэа са зборам бурака. Вызначыць мадэль складана, але каштуе яна адназначна не танна.
Так, камбайн, вельмі падобны да таго, на якім працуе беларус, прадаецца ў Нідэрландах за 42 500 еўра. І гэта за тэхніку 2004 года выпуску.
Каментары