Амерыканскі горад запаскуджваюць гусі. Улады выдаткуюць амаль 400 000 даляраў, каб адпудзіць птушак

У горадзе Фостэр-Сіці ў Паўночнай Каліфорніі з насельніцтвам каля 33 000 чалавек адначасова можа знаходзіцца да 400 канадскіх казарак. Штодня яны пакідаюць пасля сябе сотні кілаграмаў памёту, што не толькі псуе выгляд паркаў і газонаў, але і пагаршае бактэрыяльны фон у мясцовых вадаёмах. Акрамя таго, буйныя птушкі часам паводзяць сябе агрэсіўна і палохаюць дзяцей. Аб гэтым піша The Washington Post.

Раней канадскія казаркі звычайна адляталі на зімоўку ў больш цёплыя рэгіёны, але цяпер яны застаюцца. Прычына простая: зручныя паркі, штучныя азёры і лёгкі доступ да ежы.

Як адзначае біёлаг Мелані Уівер з Дэпартамента рыбы і дзікай прыроды Каліфорніі, людзі самі стварылі для іх ідэальныя ўмовы — месца для гняздавання і багатую кармавую базу. «Гэта рэцэпт праблемы».

Няўдалыя спробы: ад адстрэлу да агароджаў

Улады горада неаднаразова спрабавалі вырашыць праблему. У 2021 годзе быў зацверджаны радыкальны план па забойстве больш за 100 птушак, але пасля масавага грамадскага абурэння ад яго прыйшлося адмовіцца.

Тады горад перайшоў да нелетальных метадаў. Спрабавалі апрацоўваць яйкі гусей спецыяльным алеем, каб спыніць развіццё зародкаў, а таксама ўсталёўвалі агароджы вакол паркаў. Аднак гэтыя меры не прынеслі жаданага выніку — папуляцыя птушак працягвала расці.

Новы план: высокатэхналагічная вайна з гусямі

Зразумеўшы, што простыя метады не працуюць, улады Фостэр-Сіці вырашылі пайсці на беспрэцэдэнтныя меры і вылучылі на пілотную праграму амаль 390 000 даляраў. Выкананнем зоймецца спецыялізаваная фірма Wildlife Innovations, якая прапануе комплексны падыход.

У арсенале спецыялістаў дроны ў форме сокалаў, сабак пароды бордэр-колі для імітацыі драпежнікаў і нават дыстанцыйна кіраваныя прылады, што плаваюць па вадзе.

Павялічыць

Галоўная стратэгія — пастаянна мяняць тактыку, каб разумныя птушкі не паспявалі прызвычаіцца.

«Мы не будзем выкладваць усе карты на стол адразу. Кожны раз, калі яны пачнуць адаптавацца, мы прапануем нешта новае», — тлумачыць кіраўнік фірмы Джэйк Мэнлі.

Напрыклад, калі птушкі прызвычаяцца да звычайных дронаў, на іх усталююць чырвоныя мігатлівыя агні або ўключаць запісы крыкаў трывогі. Іншыя дроны могуць быць абсталяваныя крыламі, якія махаюць, каб быць падобнымі да сокалаў.

Перспектывы

Улады горада разумеюць, што цалкам пазбавіцца ад гусей не атрымаецца. Галоўная мэта — значна зменшыць іх колькасць і, як вынік, колькасць памёту на вуліцах. Дырэктар паркаў Дэрэк Швайгарт лічыць, што інвестыцыі акупяцца, бо горад зможа зэканоміць на штогадовай уборцы і мыйцы тэрыторый.

Аднак эколагі папярэджваюць: выгнаныя з Фостэр-Сіці гусі, хутчэй за ўсё, проста перамесцяцца ў суседнія гарады. Таму для канчатковага вырашэння праблемы спатрэбіцца каардынацыя намаганняў паміж усімі навакольнымі муніцыпалітэтамі.

• 0
• 0
• 0
• 0
• 0
• 0
• 0
• 0