Медыкі расказалі пра стан пацярпелых у страшным ДТЗ у Дзятлаўскім раёне
Учора на Гродзеншчыне адбылася аварыя, у якой загінулі тры чалавекі — абодва кіроўцы і 47-гадовая пасажырка Renault. Трое дзяцей і двое дарослых былі шпіталізаваныя. Мінздароўя паведаміла, што з пацярпелымі цяпер.
Паводле паведамлення, усе пацярпелыя былі дастаўлены ў Дзятлаўскую ЦРБ.
4-гадовы хлопчык і 12-гадовая дзяўчынка з цяжкімі траўмамі паступілі ў рэанімацыю. Дзяўчынцы зрабілі тэрміновую аперацыю яшчэ да прыбыцця абласных спецыялістаў.
У Дзятлава прыбылі хірург, анестэзіёлаг-рэаніматолаг і траўматолаг з Гродзенскай абласной дзіцячай бальніцы, нейрахірург і таракальны хірург з Бальніцы хуткай медыцынскай дапамогі Гродна, а таксама дзіцячы нейрахірург і дзіцячы рэаніматолаг з Рэспубліканскага цэнтра арганізацыі медыцынскага рэагавання.
На гэты момант 12-гадовая дзяўчынка застаецца ў рэанімацыі Дзятлаўскай ЦРБ, яе стан ацэньваецца як цяжкі; пасля стабілізацыі яе плануюць перавесці ў Гродзенскую абласную дзіцячую клінічную бальніцу.
4-гадовы хлопчык з траўмай жывата і пераломам галёнкаступнёвага сустава ўжо пераведзены ў Гродзенскую абласную дзіцячую клінічную бальніцу — яго транспарціроўку суправаджалі супрацоўнікі ДАІ для забеспячэння аператыўнасці.
23-гадовая пацыентка з пераломам сцягна працягне лячэнне ў Бальніцы хуткай медыцынскай дапамогі.
17-гадовы падлетак і 24-гадовая дзяўчына будуць лячыцца ў хірургічным аддзяленні Дзятлаўскай ЦРБ, іх стан ацэньваецца як сярэдняй цяжкасці.
Каментары