У гандлёвых сетках чарговы дэтэктыўны трылер: з паліц знікла цыбуля. Tochka.by апытала ўдзельнікаў рынку і высветліла, што здарылася.
Спачатку ўзніклі праблемы з бульбай: спачатку яе не было, потым з’явілася, але суадносіны «цана — якасць» выклікалі шмат пытанняў. Цяпер жа ў продажы амаль немагчыма знайсці звычайную рэпчатую цыбулю.
Для праверкі сітуацыі журналісты выпадковым чынам выбралі 12 крам у розных раёнах горада — ад невялікіх гандлёвых кропак да буйных гіпермаркетаў. Толькі ў дзвюх крамах была цыбуля.
Крамы «каля дома»:
У «Еўраопце» на вул. Свярдлова, 22, не аказалася ніякай цыбулі. Такая ж сітуацыя ў «Суседзях» на вул. Кірава, 4.
Няма гэтай гародніны і ў «Санце» на вул. Кунцаўшчына, 27, і вул. Волаха, 2.
І толькі ў адной з крамаў фармату «каля дома» знайшлі звычайную цыбулю па цане 2,25 рубля за кілаграм — у «Еўраопце» на вул. Кунцаўшчына, 19. Прычым якасць была добрая. У асартыменце была і чырвоная — за 2,68 рубля.
У буйнейшых крамах — таксама праблема
У супермаркеце «Суседзі» ў ТРЦ Galileo таксама не было ніякай цыбулі.
А ў «Гіпа» на вул. Адзінцова, 65, знайшлася толькі чырвоная з Расіі за 3,99 рубля. Звычайнай не было і ў гіпермаркетах розных гандлёвых сетак.
Так, у «Кароне» на вул. Кальварыйскай, 24, на паліцах была толькі расійская чырвоная цыбуля (4,38 рубля). У гіпермаркеце Green на вул. Прытыцкага, 156, прадавалася таксама толькі чырвоная— 3,98 рубля.
Каб зразумець, чаму знікла цыбуля, журналісты звярнуліся да спецыялістаў у сферы рытэйлу, знаёмых з сітуацыяй знутры.
Прадстаўнікі гандлёвых сетак бачаць цэлы комплекс прычын, што прывялі да дэфіцыту. Згодна з пастановай урада «Аб стабілізацыйных фондах тавараў», цыбуля павінна была прысутнічаць у наяўнасці толькі да красавіка. У маі ж у запасах застаюцца толькі караняплоды.
«Так што ў маі стабфонд ужо не абавязаны пастаўляць цыбулю ў гандаль — яе няма ў сховішчах. Да таго ж мінулы год для цыбулі быў неўраджайны. І тое, што заклалі, было далёка не лепшай якасці: галоўкі дробныя, хутка псаваліся», — распавяла крыніца Tochka.by.
І яшчэ адзін нюанс: згодна з іншай пастановай Савета Міністраў, для рознічнага гандлю да 15 мая на звычайную рэпчатую цыбулю (незалежна ад таго, імпартная яна ці айчынная) была ўстаноўлена максімальная цана — 2,25 рубля. Закупачная цана імпартнай гародніны не дазваляе гандлю сфармаваць патрэбную рознічную цану.
Як паведамілі ў рытэйле, цяпер у рознічным продажы ёсць чырвоная і белая цыбуля, цыбуля-шалот і іншыя гатункі, на якія цэны не рэгулююцца.
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары
Нашу танную вывезлі ў Расею, а нам завезлі расейскую па дарагой цане.