Рэканструкцыя кінатэатра «Масква» завершылася напярэдадні Дня Перамогі. Урачыстае адкрыццё — сёння 7 мая, пішуць Мінск-навіны.
Абнаўленне будынка пачалося ў 2023 годзе.Будаўнікі, якія займаліся абнаўленнем будынка, неаднаразова распавядалі, што пры падрыхтоўцы праекта архітэктары аддавалі перавагу нестандартным рашэнням.
— «Масква» — сапраўды ўнікальны кінатэатр. Пры будаўніцтве выкарыстоўваліся найпрасцейшыя інжынерныя рашэнні. Іх нават вывучалі ў ВНУ, сёння так ужо не будуюць. З-за нестандартнай планіроўкі кожны дзень на пляцоўцы не быў падобны на папярэдні: даводзілася рэгулярна сутыкацца з новымі задачамі, шукаць аптымальныя выхады з сітуацыі, — дзяліліся спецыялісты.
Зроблена нямала: заменены дах, «перазбіралі» дзве лесвіцы, узмацнілі некаторыя канструкцыі, дэмантавалі практычна ўсе ўнутраныя перагародкі і тэхналагічнае абсталяванне, усталявалі прыточна-выцяжныя камеры і сантэхніку, фасад аднавілі амаль у першапачатковым выглядзе. Сам будынак абліцавалі керамагранітам, што імітуе прыродны мармур. Плітку для абліцоўкі спецыяльна для «Масквы» вырабіла адно з профільных мінскіх прадпрыемстваў. Старое вітражнае шкленне замянілі на энергаэфектыўнае мультымедыйнае, абнавілі ўсе свяцільні. Пры гэтым засталіся некранутымі 15 медных шчытоў над узроўнем другога паверха, што сімвалізуюць рэспублікі СССР.
Асноўныя змены закранулі ўнутранае ўбранне. Напрыклад, за кошт перапланіроўкі замест двух залаў будуць працаваць чатыры: два на 48 і па адным на 654 і 233 месцы. Паводле слоў спецыялістаў, па функцыянальнасці і тэхнічных магчымасцях яны нічым не саступаюць залам у больш «маладых» кінатэатрах горада. Іх аснасцілі найноўшымі праектарамі і гукавымі сістэмамі, здольнымі забяспечыць высокую якасць выявы і гучання, а таксама зручнымі крэсламі. Паклапаціліся і пра людзей з абмежаванымі магчымасцямі — для камфортнага перамяшчэння ўсталяваны спецыяльныя пад’ёмнікі.
Пераўтварэнні закранулі і агульныя прасторы. Праўда, некаторыя пазнавальныя элементы інтэр’ера ўсё ж не чапалі. У вестыбюлі захаваліся паверхні, аздобленыя мармурам і гранітам, а таксама калоны, часткова лесвіцы з парэнчамі, падлогі і не толькі. Перад пачаткам работ іх накрылі ахоўнымі матэрыяламі. Без змяненняў пакінулі і вітраж «Масква — сталіца нашай Радзімы», які мае гісторыка-культурную каштоўнасць. Аднавілі існуючыя шкляныя элементы дэкору, што ўпрыгожваюць калідоры. Некаторыя дэталі для іх вырабляліся на замову.
Акрамя таго, добраўпарадкавалі тэрыторыю, што прымыкае да кінатэатра. Уклалі плітку, на некаторых участках дадалі тактыльнае пакрыццё, крыху абнавілі фантан, усталявалі лаўкі і скамейкі.
Пасля адкрыцця «Масквы» наведвальнікі змогуць не толькі ўдзельнічаць у спецыяльных паказах і фестывальных праграмах, але і падсілкавацца ў кавярні. Таксама прадугледжана коворкінг-прастора для сустрэч, зносін і сумеснай працы моладзі. Дарэчы, у дзень адкрыцця — 7 мая — будзе дзейнічаць святочная зніжка 50 % на квіткі.
«Маскву» ўвялі ў эксплуатацыю неўзабаве пасля Алімпіяды-80. Кінатэатр стаў першым шырокафарматным у Беларусі, дзе размясціліся два залы. Яны былі разлічаныя на 260 і 1 070 месцаў.
Цяпер чытаюць
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці66
Учора — у лукашэнкаўскай турме, сёння — у Кіеве дапамагае ўкраінцам выжыць. Былы палітвязень і сваяк Ціханоўскай стаў валанцёрам у Пункце нязломнасці6
Хочаце жыць доўга — шукайце раён з нармальнымі дрэвамі. Навукоўцы высветлілі, што дрэвы ратуюць ад інфарктаў, а газоны могуць нават нашкодзіць здароўю44
Каментары