Беларуску Наталлю Судлянкову ўключылі ў праект чарговага пакета санкцый ЕС
Еўрапейская камісія разглядае 17-ы пакет санкцый супраць уладаў Расіі і Беларусі, якім плануецца дадаць у санкцыйны спіс 21 фізічную асобу і 6 юрыдычных. Паводле звестак «Радыё Свабода», у пераліку асоб, адказных за «дэстабілізацыйную дзейнасць», фігуруе грамадзянка Беларусі Наталля Судлянкова, якую нядаўна выкрылі ў Чэхіі ў супрацоўніцтве з расійскай разведкай.
У тлумачальнай частцы праекта пастановы Еўрапейскай рады, з якой азнаёмілася «Радыё Свабода», адзначаецца, што Наталля Судлянкова распрацоўвае медыйную прадукцыю па замове, якая ўключае маніпуляванне інфармацыяй і распаўсюджанне хлуслівых наратываў, скіраваных на падтрымку знешнепалітычных інтарэсаў Расіі і падрыў даверу грамадскасці да нацыянальных і дэмакратычных каштоўнасцяў Чэхіі і працэсаў Еўрапейскага Саюза.
У дакуменце таксама паведамляецца, што Судлянкова на працягу доўгага часу атрымлівала заданні з Расіі і фінансавае ўзнагароджанне, адыгрывала значную ролю ў планаванні і кіраванні інфармацыйнымі маніпуляцыямі, скіраванымі на грамадскасць Чэхіі і іншых дзяржаў — членаў ЕС, а таксама супрацоўнічала з расійскімі дзяржаўнымі структурамі, уключаючы «Бессмяротны полк» і супрацоўнікаў ГРУ.
У 1999 годзе Наталля Судлянкова, ратуючыся ад пераследу ў Беларусі, атрымала палітычны прытулак у Чэхіі. Яна не мела чэшскага грамадзянства, але атрымала дазвол на пастаяннае жыхарства. У мінулым годзе ёй была выдадзеная новы ДНЖ на 10 гадоў. Верагодна, тэрмін дзеяння беларускага пашпарта скончыўся, таму ў 2021 годзе ёй быў выдадзены падарожны дакумент.
У Чэхіі Судлянкова працавала галоўным рэдактарам «Пражскага тэлеграфа» — рускамоўнага штотыднёвіка, які выдаваўся ў Празе. У мінулым яна таксама супрацоўнічала з Радыё Свабодная Еўропа/Радыё Свабода і з часопісамі Týden і Lidové noviny.
Пра тое, што Наталля Судлянкова разам з супрацоўнікам расійскай спецслужбы ГРУ Аляксеем Шаўровым дададзеныя ў чэшскі нацыянальны санкцыйны спіс, 2 красавіка паведаміла Служба інфармацыйнай бяспекі Чэхіі (BIS). Жанчына павінна была на працягу 30 дзён пакінуць тэрыторыю краіны, што і зрабіла 1 мая, выехаўшы ў Маскву.
Каментары