«Увесь час застаецца чорны асадак». У «Мінск-Свеце» скардзяцца на жудасную ваду
Жыхары «Мінск-Света» пішуць у Threads пра дрэнную якасць вады ў комплексе. «Гэтую ваду яны называюць артэзіянскай», — іранізуюць людзі.
Адна з жыхарак «Мінск-Свету» апублікавала ў Threads фота фільтра для вады, які, паводле яе слоў, стаяў толькі два дні. Дзеля параўнання на фота ёсць і чысты фільтр.
Жанчына не хавае ўражанняў:
«У такой вадзе мы гатуем, мы купаем дзяцей і гэтак далей. Гэтую ваду яны называюць артэзіянскай. Калі нехта шукае прычыну выпадзення валасоў, пачніце з вады».
Пры гэтым, кажа жанчына, у кватэры ўжо стаіць сістэма ачысткі вады:
«Гэты фільтр паставіла проста ў дадатак па парадзе трыхолага, каб валасы мыць. Як бачыце, нават з сістэмай якасць дрэнная. Мяняем не раз на паўгода, а штомесяц».
У каментары да жанчыны прыйшоў зваршчык, які, паводле яго слоў, удзельнічаў у зварцы труб, якія падаюць ваду ў Мінск. Ён расказаў, што калі давялося рэзаць тыя трубы, то аказалася, што ў пэўных месцах яны забітыя пяском і ілам на чвэрць дыяметра. То-бок сама вада можа быць добрай, але праблема ў брудных трубах.
Іншыя жыхары «Мінск-Света» дзеляцца сваімі гісторыямі пра ваду:
«Апошні год практычна штодзень брудная вада. Колькі я ні звярталася ў 115 і водаканал, нічога не змяняецца».
«Пагаджуся, жудасная якасць вады, Кастрычніцкі раён».
«Тая ж сітуацыя, учора мяняў зменныя картрыджы ў фільтры».
«Як я стамілася, што дзяцей не магу пакупаць у ваннай. Увесь час застаецца чорны асадак, падобны да металічнай стружкі ці зямлі. Колькі разоў я пісала ў 115, дасылала фота. Кастрычніцкі раён. Памятаю, як нехта казаў, што ў «Мінск-Свеце» артэзіянская вада».
У каментарах да паста жыхаркі «Мінск-Света» адзначыліся мінчукі з іншых раёнаў. Аказалася, што і там не ўсе атрымліваюць абяцаную артэзіянскую ваду, хаця былі і тыя, у каго ўсё добра:
«Паўднёвы Захад і Малінаўка такія ж. Прапускаю праз такі фільтр ваду для ўвільгатняльніка, не дапамагае».
«Кунцаўшчына — тая ж сітуацыя».
«Паўгода выкарыстоўваю такія фільтры, гісторыя дакладна такая ж, але жыву ў зусім іншым раёне».
«Наша Нiва» — бастыён беларушчыны
ПАДТРЫМАЦЬЦяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»26
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары