За першы вясновы месяц афіцыйныя дылеры ў Беларусі прадалі новых легкавых аўтамабіляў на 6,9% менш, чым у лютым. Асабліва прыкметным аказалася зніжэнне продажаў «зялёных» аўто — электрамабіляў і гібрыдаў, паведамілі ў Аўтамабільнай асацыяцыі БАА.
Доля «зялёных» аўтамабіляў у агульных продажах у сакавіку склала менш за 12%, хоць месяц таму яна дасягала 12,6%.
«Мы звязваем гэта з зменамі ў умовах фінансавання, якія часова паўплывалі на пакупніцкую актыўнасць», — пракаментаваў член праўлення БАА, выканаўчы дырэктар аўтамабільнага холдынга «Атлант-М» Сяргей Самойла.
Па выніках I квартала членамі БАА ў Беларусі было прададзена 13 тыс. новых легкавых аўтамабіляў. За тры месяцы рынак у параўнанні з аналагічным перыядам мінулага года вырас у 1,7 раза. Тое, што гэты рост будзе запавольвацца, у БАА прагназавалі яшчэ ў пачатку сакавіка.
Як паведамляецца, у сакавіку лідарам продажаў па-ранейшаму заставаўся беларускі брэнд Belgee. Хоць яго доля (сумесна з продажамі Geely) знізілася з 48,3% да 42%. Другое месца займае LADA з доляй 33%.
Можна выказаць здагадку, што зніжэнне продажаў звязана з падаражаннем банкаўскіх крэдытаў, а таксама з лютаўскім павышэннем ставак утылізацыйнага збору і забаронай «псеўдавалютнага» лізінгу для фізічных асоб.
Каментары