Жыхарцы Гомеля, што выкінула сабаку з балкона, далі тры месяцы арышту
Абвінавачаная сцвярджала ў судзе, што ўсё здарылася выпадкова, але сусед засведчыў адваротнае.
У жніўні мінулага года 43-гадовая гамяльчанка разам з сябрам прыйшла ў госці да былога сужыцеля, які вярнуўся з заробкаў.
Жанчына завяла сабачку па мянушцы Аля яшчэ падчас адносін са сваім былым сужыцелем. Пасля расстання гадаванец застаўся жыць з мужчынам, а жанчына часам забірала яго да сябе. Так адбылося і гэтым разам.
Пасля вяртання дадому жанчына выйшла пакурыць на балкон, узяўшы з сабой сабаку. Неўзабаве гадаванец выпаў з балкона і разбіўся.
Абвінавачаная сцвярджала ў судзе, што ўсё здарылася выпадкова: нібыта Аля вырвалася з рук, калі яна пачала адмахвацца ад дыму цыгарэты.
Аднак сусед з балкона насупраць засведчыў, што жанчына спецыяльна працягнула рукі і выпусціла сабаку.
Калі прыехала міліцыя, патрапіць у кватэру да жанчыны не атрымалася — яна не адчыняла дзверы. Пры гэтым, паводле суседзяў, пасля здарэння з кватэры быў чуваць смех і вясёлыя спевы.
Суд Савецкага раёна Гомеля прызнаў жанчыну вінаватай і прысудзіў да трох месяцаў арышту. Акрамя таго, яна павінна прайсці прымусовае лячэнне ад хранічнага алкагалізму.
Цяпер чытаюць
Хто прадаў кватэру ў «Маяку Мінска» зніклай Мельнікавай? Такога чалавека не існуе22
Каментары