У Брэсце несумленны пакупнік вярнуў у краму стары няспраўны тавар замест новага
У міліцыю звярнуўся супрацоўнік анлайн-гіпермаркета. Ён расказаў, што невядомы мужчына шляхам падману завалодаў робатам-пыласосам, шкода склала больш за 600 рублёў.
Напярэдадні па атрыманне заказу прыйшоў кліент, а праз суткі ён аформіў вяртанне набытай бытавой тэхнікі, атрымаўшы грошы за адменены заказ.
Падчас праверкі тавару супрацоўнікамі крамы была выяўлена падмена: замест новага тавару была вернута тэхніка са слядамі доўгага выкарыстання. Акрамя таго, вернуты тавар не адпавядаў упакоўцы і тэхнічным характарыстыкам. Пры гэтым шыльда з серыйным нумарам мела прыкметы знешняга ўздзеяння — яе пераклейвалі.
Хутка была ўстаноўлена асоба пакупніка. Ім аказаўся 52-гадовы жыхар Баранавічаў. Была прызначана таваразнаўчая экспертыза.
Згодна з заключэннем эксперта ўпраўлення Дзяржкамітэта судовых экспертыз па Брэсцкай вобласці, рэшткавы кошт ранейшага робата-пыласоса склаў 68 рублёў, паведамляе Дзяржкамітэт судовых экспертыз.
Чым кіраваўся кліент інтэрнэт-крамы, вяртаючы замест новага тавару выкарыстаны, высветліць следства.
Каментары