Масавыя пратэсты ў Сербіі: студэнты перакрылі аўтамагістраль у Бялградзе, да іх далучыліся фермеры на трактарах
У сталіцы Сербіі Бялградзе ў панядзелак удзельнікі акцыі пратэсту студэнтаў перакрылі важную транспартную магістраль. Блакада павінна працягнуцца 24 гадзіны.
У акцыі ўдзельнічаюць і прадстаўнікі іншых груп насельніцтва, якія падтрымліваюць патрабаванні студэнтаў — у прыватнасці, фермеры прыехалі на трактарах, піша Радыё Свабода.
Пратэсты ў Бялградзе і іншых гарадах Сербіі працягваюцца ўжо больш за месяц. Яны пачаліся пасля трагедыі ў горадзе Нові-Сад на поўначы Сербіі. Там 1 лістапада праз падзенне даху на чыгуначным вакзале загінулі 15 чалавек.
Студэнты першапачаткова запатрабавалі празрыстага расследавання трагедыі і прыцягнення да адказнасці вінаватых. Студэнты, якіх падтрымліваюць актывісты апазіцыі і прадстаўнікі грамадзянскай супольнасці, лічаць адказнымі за тое, што здарылася ўлады, абвінавачваючы іх у карупцыі, якая і прывяла да няякаснага рамонту будынка вакзала.
Пасля таго, як улады, на думку ўдзельнікаў акцый пратэсту, не прыслухаліся да іх патрабаванняў, пачалі вылучацца і палітычныя патрабаванні, у прыватнасці аб стварэнні пераходнага ўрада, які падрыхтаваў бы свабодныя датэрміновыя выбары ў парламент. Для многіх удзельнікаў пратэстаў трагедыя ў Нові-Садзе стала пацвярджэннем таго, што, на іх думку, урад і Прэзідэнт Аляксандр Вучыч вядуць краіну па няправільным шляху.
Пасля серыі масавых мітынгаў у мінулую пятніцу быў арганізаваны ўсеагульны страйк, да якога далучыліся навучальныя ўстановы і каля 200 кампаній па ўсёй краіне. У выходныя ў Бялградзе і іншых гарадах зноў прайшлі маршы пратэсту.
Яшчэ ў снежні заблакаваная праца больш за 50 факультэтаў чатырох дзяржаўных універсітэтаў, а таксама дзясяткаў сярэдніх школ.
Прэзідэнт Вучыч, з аднаго боку, абяцае прыслухацца да патрабаванняў удзельнікаў акцый пратэсту. У прыватнасці ў суботу ён заклікаў чыноўнікаў апублікаваць усе дакументы, звязаныя з рэканструкцыяй вакзала — гэта адно з патрабаванняў студэнтаў. З іншага боку, Вучыч і яго прыхільнікі абвінавачваюць дэманстрантаў у супрацоўніцтве з нейкімі замежнымі сіламі з мэтай дэстабілізаваць Сербію.
-
Бенгальскія агні на шампанскім сталі прычынай пажару ў бары ў Швейцарыі, дзе загінулі 40 чалавек
-
Кіруючая партыя Германіі хоча высылаць сірыйцаў, якія беглі ад грамадзянскай вайны, назад на радзіму — нават рэгулярнымі рэйсамі
-
Еўракамісія пачала расследаванне з-за тыктокаў, створаных з дапамогай штучнага інтэлекту, якія заклікаюць да выхаду Польшчы з ЕС
Цяпер чытаюць
«Паша, я табе не веру». Севярынец расказаў, як выпадковая дзяўчына матывавала яго назаўсёды перайсці на беларускую мову4
Каментары