«У панядзелак вам будзе вельмі весела глядзець тэлевізар». Трамп выступіў перад прыхільнікамі напярэдадні інаўгурацыі
Абраны прэзідэнт ЗША Дональд Трамп выступіў на мітынгу сваіх прыхільнікаў у комплексе Capital One Arena у Вашынгтоне напярэдадні сваёй інаўгурацыі, паабяцаўшы ў першы ж дзень знаходжання на пасадзе кіраўніка дзяржавы падпісаць мноства ўказаў.
«Мы перамаглі!» — сказаў Трамп у пачатку выступу пад крыкі натоўпу.
Ён заявіў, што новая адміністрацыя збіраецца «пакласці канец панаванню правальнага істэблішменту ў Вашынгтоне» і «зрабіць Амерыку зноў вялікай».
«У панядзелак апоўдні [а 20-й па Мінску — НН] зачыніцца заслона чатырох доўгіх гадоў амерыканскага заняпаду, і мы пачнем зусім новую главу для амерыканскай сілы і росквіту, годнасці і гонару. Вярнем усё гэта раз і назаўсёды», — сказаў Трамп.
Ён таксама паабяцаў спыніць «уварванне» нелегальных мігрантаў на амерыканскай мяжы, паабяцаўшы агучыць канкрэтныя меры ў інаўгурацыйнай прамове ў панядзелак.
Эксперты кажуць, што яго абяцанне дэпартаваць мільёны нелегальных мігрантаў сутыкнецца з велізарнымі лагістычнымі цяжкасцямі і можа абысціся ў дзясяткі або сотні мільярдаў даляраў.
Па словах Трампа, у панядзелак ён збіраецца падпісаць мноства ўказаў, якія «вельмі парадуюць» амерыканцаў.
«Усё пачнецца ў панядзелак. У панядзелак вам будзе вельмі весела глядзець тэлевізар», — паабяцаў Дональд Трамп.
Чакаецца, што ў панядзелак ён падпіша больш за 200 дакументаў, у тым ліку выканаўчыя ўказы і іншыя прэзідэнцкія распараджэнні.
«Кожны радыкальны і дурны ўказ адміністрацыі Байдэна будзе адменены на працягу некалькіх гадзін пасля таго, як я прынясу прысягу», — дадаў Трамп.
Выступленне Трампа было даволі працяглым і больш нагадвала яго перадвыбарчыя прамовы. Гледачам дэманстравалі відэаролікі, на сцэну выходзіў бізнесмен Ілан Маск, Трамп таксама прадстаўляў ключавых супрацоўнікаў сваёй новай адміністрацыі.
У сваёй прамове Трамп закрануў пагадненне аб перамір’і ў Газе і сітуацыю з сацыяльнай сеткай TikTok, а таксама зноў паабяцаў скончыць вайну ва Украіне, але не ўдакладніў, як менавіта.
«Гэтае пагадненне магло быць дасягнута толькі ў выніку нашай гістарычнай перамогі ў лістападзе», — сказаў ён. Трамп, у прыватнасці, падзякаваў свайму спецпасланніку на Блізкім Усходзе Стыва Віткофа за дапамогу ў дасягненні пагаднення.
«Мы дабіліся больш, не будучы прэзідэнтамі, чым яны дабіліся за чатыры гады з прэзідэнтам», — заявіў Трамп.
Абраны прэзідэнт таксама заявіў, што яму падабаецца сацыяльная сетка TikTok, якая аднавіла працу ў нядзелю пасля абяцання Трампа даць сэрвісу адтэрміноўку на тры месяцы да забароны, і сказаў, што «цікток неабходна захаваць».
«З сённяшняга дня TikTok вяртаецца ў ЗША», — сказаў Трамп.
«Шчыра кажучы, у нас няма выбару, мы павінны яго захаваць. Вельмі шмат працоўных месцаў. Мы не хочам аддаваць наш бізнэс Кітаю, мы не хочам аддаваць наш бізнес іншым людзям», — дадаў ён.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары