У планах Расіі — падзяліць Украіну на тры часткі. Вось карта з сакрэтнага расійскага дакумента
Міністэрства абароны Расіі падрыхтавала дакумент з прагнозам развіцця ваенна-палітычнай сітуацыі ў свеце да 2045 года. У ім прадугледжваецца падзел Украіны на тры часткі і працяг акупацыі краіны. Існаванне такога «мірнага» расійскага плана пацвердзіла ўкраінскае ГУР, дзе называюць дакумент сапраўдным.
Сцэнар украінскага будучага, з пункту гледжання Расіі, які апісваецца ў сакрэтным дакуменце Міністэрства абароны Расіі, апублікавала са спасылкай на разведку Украіны агенцтва «Інтэрфакс-Украіна».
Паводле даных агенцтва, Пуцін гатовы абмяркоўваць з Дональдам Трампам спыненне агню пры ўмове, што Расія захавае за сабой значныя тэрыторыі Украіны, а сама Украіна адмовіцца ад планаў уступлення ў НАТА.
Паводле гэтай інфармацыі, Крэмль мае намер падзяліць Украіну на тры часткі.
Увесь усход краіны (Данецкая, Луганская, Запарожская і Херсонская вобласці), а таксама Крым павінны адысці да Расіі.
Другую буйную частку краіны (уключаючы рэгіёны Кіева, Сум і Адэсы) плануецца ператварыць у «прарасійскае дзяржаўнае ўтварэнне». Уладныя структуры ў гэтай зоне будуць укамплектаваны прарасійскімі кадрамі, а на яе тэрыторыі будуць размешчаны расійскія войскі для кантролю. То-бок Украіна ператворыцца ў марыянеткавую дзяржаву, якая кіруецца з Масквы.
Астатняя частка на захадзе Украіны ў дакуменце названа «спрэчнымі тэрыторыямі». Што з імі рабіць, мяркуецца вырашыць у ходзе перагавораў паміж Расіяй і суседнімі краінамі — Венгрыяй, Польшчай і Румыніяй.
У сакрэтным дакуменце нібыта разглядаюцца таксама чатыры сцэнарыі развіцця сусветных падзей у бліжэйшыя гады. Першыя два называюцца «Фарміраванне шматпалярнага свету і падзел вядучымі актарамі сфер уплыву» (буйныя дзяржавы дзеляць паміж сабой сферы ўплыву) і «Рэгіяналізацыя / хаатызацыя» (міжнародны парадак аслабляецца). У абодвух сцэнарах Расія перамагае Украіну, а сусветная сітуацыя складваецца для Масквы «прымальна».
Калі ж вайна будзе замарожаная ці Расія яе прайграе, магчымыя два іншыя сцэнары: «Дамінаванне ЗША і Захаду» і «Набыццё Кітаем статусу вядучай дзяржавы свету». Абодва варыянты лічацца неспрыяльнымі.
У ГУР Украіны пацвердзілі існаванне плана РФ па падзеле Украіны на тры часткі. Там заяўляюць, што Міністэрства абароны і Генштаб Узброеных сіл Расіі прыкладна ў снежні 2023 года падрыхтавалі план падзелу тэрыторыі Украіны на тры часткі. Гэта ў каментары агенцтву «Інтэрфакс-Украіна» заявіў прадстаўнік Галоўнага ўпраўлення разведкі Міністэрства абароны Украіны Вадзім Скібіцкі.
Каментароў іншых структур, у тым ліку заходніх, якія б пацвердзілі такія планы Крамля, няма.
Цяпер чытаюць
Старшыня Рады бяспекі заклікаў беларусаў устрымацца ад паездак у Расію3
Каментары