Кіраўнік Віцебскай вобласці расказаў пра спаборніцтва з іншымі абласцямі па колькасці подпісаў за Лукашэнку
Аляксандр Субоцін заявіў, што кожны «хоча сябе паказаць».
Старшыня Віцебскага аблвыканкама Аляксандр Субоцін расказаў пра спаборніцтвы паміж абласцямі па колькасці подпісаў за Лукашэнку.
У эфіры БТ ён, усміхаючыся, адзначыў, што спаборніцтва звычайна заканчваюцца ўнічыю, таму што кожная вобласць імкнецца сябе паказаць.
«Традыцыйна спаборніцкі эфект у абласцях прысутнічае. Хоць, у прынцыпе, лічбы прыблізна аднолькавыя, калі паглядзець, плюс-мінус. Таму што ўсё роўна кожны рэгіён хоча і сябе паказаць, і шмат і прыхільнікаў нашага асноўнага кандыдата», — заявіў Субоцін.
На саміце БРІКС у кастрычніку Лукашэнка ў інтэрв'ю «Известиям» заявіў, што губернатары маглі прыпісаць яму галасы на выбарах-2020.
«Я нават прызнаўся, што … Ну добра, там, 82 ці колькі было працэнтаў. У губернатараў — і ў вас у Расіі, і ў нас ёсць такое спаборніцтва: Гомельская вобласць там — 79%, ну, я тут буду ўсё рабіць, каб было 79,5%. 80%? Ну, 80 і дзве дзясятыя», — сказаў тады Лукашэнка.
Ён дапусціў, што губернатары маглі сфальсіфікаваць яму 3-5% галасоў.
Да збору подпісаў за вылучэнні кандыдатаў у прэзідэнты, акрамя Лукашэнкі, дапусцілі Алега Гайдукевіча, Аляксандра Хіжняка, Вольгу Чамаданаву, Сяргея Бобрыкава, Сяргея Сыранкова і Ганну Канапацкую. Да 6 снежня ім неабходна сабраць 100 тысяч подпісаў.
Пры гэтым дзяржаўныя мясцовыя СМІ, даючы справаздачу пра «актыўную падпісную кампанію», на ўсялякі выпадак паказваюць фатаграфіі практычна выключна пікетаў Лукашэнкі, зборшчыкі подпісаў за іншых прэтэндэнтаў у кадр трапляюць вельмі рэдка.
Зрэшты, прэтэндэнты і самі, не саромеючыся, агітуюць за свайго нібыта канкурэнта: напрыклад, камуніст Сыранкоў у сацсетках партыі горда расказаў, што перш за ўсё паставіў подпіс менавіта за Лукашэнку.
Цяпер чытаюць
Статкевіч: Калі зноў пачнуцца масавыя пратэсты, яны ўжо не будуць такімі мірнымі, як у 2020‑м. А ЕС правільна перастаў верыць казкам Лукашэнкі17
Статкевіч: Калі зноў пачнуцца масавыя пратэсты, яны ўжо не будуць такімі мірнымі, як у 2020‑м. А ЕС правільна перастаў верыць казкам Лукашэнкі
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
Каментары