«Белавія» спрабавала закупіць новыя самалёты, але кітайскія дарагія, а расійскія непрыдатныя для далёкіх палётаў
Закупіць заходнія, нават патрыманыя, самалёты пакуль не атрымліваецца праз санкцыі. Пра гэта піша «Белпол» са спасылкай на афіцыйныя дакументы.
Днямі гендырэктар авіякампанія «Белавія» Ігар Чаргінец заявіў, што, нягледзячы на санкцыі, кампанія не мае праблем з запаснымі часткамі і гарантуе бяспеку палётаў.
Разам з тым, згодна з дакументамі, якія дастаў «Белпол», санкцыі значна ўскладнілі працу «Белавія».
Апошнія самалёты былі закуплены ў 2020 годзе ў лізінг. Цяпер запыты на закупку марак Boeing, Airbus і Embraer ці ігнаруюцца, ці за іх патрабуюць 100% перадаплату, што пагражае замарожваннем сродкаў. Як вынікае з дакументаў, у авіякампаніі такіх сродкаў няма.
«Белавія» накіравала звыш 70 запытаў лізінгавым кампаніям, але яны адмовіліся ад супрацоўніцтва. Былі звароты да ўладальнікаў патрыманых самалётаў у Таджыкістане, Кыргызстане, Кітаі, ААЭ, Турцыі, Сінгапуры, Узбекістане і Манголіі. Але і яны адмовіліся.
Адзінай краінай, якая прапанавала супрацоўніцтва, быў Кітай. Але ў гэтым выпадку сама «Белавія» адмовілася. Прычынай стаў высокі кошт і наяўнасць у самалётах заходніх камплектуючых, што стварыла б праблемы з тэхнічным абслугоўваннем.
Спробы набыць самалёты расійскай вытворчасці пакуль знаходзяцца на стадыі абмеркавання, бо самі авіялайнеры толькі плануюцца да серыйнай вытворчасці. У лепшым выпадку іх пастаўкі могуць адбыцца ў 2027 годзе. І гэта пры ўмове падпісання кантракту ўжо цяпер.
Беларускі бок не ідзе на падпісанне, бо лічыць цэны завышанымі. Калі б не санкцыі, то заходнія аналагі расійскіх МС-21-310 карпарацыі «Якаўлеў» ці Sukhoi Superjet 100 абышліся б больш чым у два разы танней.
Яшчэ адной перашкодай у набыцці з'яўляецца нежаданне расійскіх лізінгавых кампаній працаваць з «Белавія». Да гэтага трэба дадаць неадпаведнасць расійскіх самалётаў заяўленым лётна-тэхнічным характарыстыкам.
Замена імпартных рухавікоў расійскімі аналагамі зрабіла гэтыя машыны цяжэйшымі і адначасова знізіла фактычную дальнасць і вышыню палёту. Таму яны непрыгодныя для палётаў у Індыю, Кітай, ААЭ і Егіпет.
Упершыню за чатыры гады Белстат апублікаваў звесткі аб нараджальнасці і смяротнасці. Даныя жахаюць39
Упершыню за чатыры гады Белстат апублікаваў звесткі аб нараджальнасці і смяротнасці. Даныя жахаюць
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў99
Каментары