Лукашэнка вызначыў статус беларускіх касманаўтаў. За даброты трэба плаціць лаяльнасцю
Аляксандр Лукашэнка 19 сакавіка падпісаў указ аб статусе беларускага касманаўта, паведаміла прэс-служба палітыка. Гэты дакумент замацоўвае правы і абавязкі касманаўта Рэспублікі Беларусь, які мае ў краіне неўзабаве з'явіцца пасля хутка запланаванага палёту ў космас Марыны Васілеўскай.
Паведамляецца, што ўказ прынялі для вызначэння прававога становішча беларускіх касманаўтаў і прыраўнаваных да іх асоб, улічваючы рэалізацыю першага ў гісторыі суверэннай Беларусі праекта па касмічным палёце.
Марына Васілеўская збіраецца стартаваць на Міжнародную касмічную станцыю з касмадрома Байканур 21 сакавіка.
У дакуменце адзначаецца, што статус касманаўта прысвойваецца грамадзяніну Рэспублікі Беларусь, які здзейсніў касмічны палёт, а таксама ягонаму дублёру. То-бок касманаўтам у Беларусі можна стаць, нават не пабываўшы ў космасе.
Для асоб са статусам беларускага касманаўта прадугледжваецца шэраг ільгот і прэферэнцый, у тым ліку захаванне займанай пасады, медабслугоўванне ў Рэспубліканскім клінічным медыцынскім цэнтры, пенсійнае забеспячэнне, дзяржпадтрымка пры будаўніцтве жылля.
Асобна ва ўказе адзначаецца, што касманаўт павінен «адпавядаць свайму высокаму званню», мець «цвёрдую грамадзянскую пазіцыю», браць актыўны ўдзел у грамадска-палітычным жыцці краіны, а таксама годна прадстаўляць Беларусь на міжнароднай арэне.
У сучасным кантэксце гэта відавочна азначае абавязак стаяць на праўладных пазіцыях і актыўна ўдзельнічаць у прапагандысцкіх мерапрыемствах.
Хто тая беларуска, якую экстрадавалі ў ЗША для суда за кантрабанду дэталяў для самалётаў8
Каментары