У Салігорску ў часе родаў пацярпела немаўля. Маці запісала ў тыктоку скаргу да Лукашэнкі — у радзільню адправілі камісію
16 студзеня Мініздароўя паведаміла, што накіроўвае спецыяльную камісію ў Салігорскую цэнтральную раённую бальніцу пасля скаргаў пацыенткі ў сацсетках на халатныя адносіны медработнікаў радзільнага дома. Выданне reform.by адшукала гэты зворот жанчыны да Аляксандра Лукашэнкі. Паводле слоў жанчыны, праз медыкаў у часе родаў пацярпела яе дзіця. Яна просіць выратаваць немаўля і пакараць медыкаў.
Пацярпелая пацыентка — жыхарка Салігорска Дарʼя Дэйлід.
Дарʼя заяўляе аб «халатных адносінах і поўнай адсутнасці медычнай этыкі і дэанталогіі» і распавядае, што пры родах пацярпеў яе сын, які зараз знаходзіцца ў рэанімацыі з 3-й ступенню дыхальнай недастатковасці, ацёкам мозгу і кефалагематомай.
Яна гаворыць, што ёй не правялі своечасова кесарава сячэнне.
«Усе мае крыкі аб дапамозе мне і дзіцяці былі праігнараваныя. Толькі калі ў дзіцяці перастала праслухоўвацца сэрцабіцце, гэта прыкладна ў 20:40 8 студзеня, мне быў зроблены агульны наркоз і кесарава сячэнне экстранае. На пытанне медыцынскім работнікам, што здарылася з парадзіхай, маім сваякам, мужу, маме і сястры, было сказана патэлефанаваць маме, то-бок мне, і спытаць у мяне, што здарылася», — распавядае Дарʼя.
Цяпер нованароджаны сын Дарʼі Дзмітрый знаходзіцца ў рэанімацыі на апараце штучнай вентыляцыі лёгкіх.
«Мой сын атрымаў найцяжэйшую ступень асфіксіі і знаходзіцца ў аддзяленні дзіцячай рэанімацыі горада Салігорска Мінскай вобласці на апараце штучнай вентыляцыі лёгкіх з наступным дыягназам: «цяжкая ступень асфіксіі, кефалагематома левай цемянной косткі пры радавой траўме 3-й ступені», — паведамляе дзяўчына.
Дарʼя просіць зняць запісы з камер відэаназірання і пакараць вінаватых.
Учора Мініздароўя паведаміла, што камісія была створаная па загадзе міністра аховы здароўя. Яе ўзначаліла намеснік дырэктара па акушэрстве і гінекалогіі РНПЦ «Маці і дзіця» Алена Гашкевіч. У Салігорск для ацэнкі сітуацыі на месцы быў накіраваны намеснік міністра аховы здароўя Юрый Горбіч. У склад камісіі ўвайшлі спецыялісты РНПЦ «Маці і дзіця», акушэры-гінеколагі, неанатолагі, анестэзіёлагі-рэаніматолагі, прадстаўнікі кафедраў БДМУ.
Каментары
вірусная інфекцыя нявысветленай паталогіі (альбо нешта кшталту гэтага)
Альбо па простаму: твае дзіця знявечанае, але дзяржмедыцына невыінаватая
Мае спачуванні