«Ланцугі сапраўды разарваныя». Кароль Нідэрландаў выбачыўся за гістарычную ролю рабства ў краіне
Прабачэнні прыйшлі на фоне больш шырокага пераасэнсавання каланіяльнага мінулага Нідэрландаў, уключаючы ўдзел як у атлантычным гандлі рабамі, так і ў рабстве ў былых азіяцкіх калоніях.
Кароль Нідэрландаў Вілем-Аляксандр у суботу папрасіў прабачэння за гістарычную датычнасць Нідэрландаў да рабства і за наступствы, якія яно мае і сёння, як піша «Еўрапейская праўда».
Кароль выступаў на цырымоніі, прысвечанай 160-годдзю юрыдычнай адмены рабства ў Нідэрландах, у тым ліку ў былых калоніях у Карыбскім басейне.
«У той дзень, калі мы ўспамінаем галандскую гісторыю рабства, я прашу прабачэння за гэта злачынства супраць чалавецтва», — сказаў кароль. Ён падкрэсліў, што расізм у галандскім грамадстве застаецца праблемай і не ўсе падтрымаюць яго прабачэнні.
Аднак «часы змяніліся, і «Кэці Коці»… ланцугі сапраўды разарваныя», — сказаў ён пад радасныя воклічы і апладысменты тысяч гледачоў ля нацыянальнага помніка рабству ў амстэрдамскім Остэрпарку.
«Кэці Коці» — гэта сурынамскія словы, якія азначаюць «ланцуг разарваны», і менавіта так называюць 1 ліпеня — Дзень памяці пра рабства і святкаванні свабоды.
Прабачэнні прыйшлі на фоне больш шырокага пераасэнсавання каланіяльнага мінулага Нідэрландаў, уключаючы ўдзел як у Атлантычным гандлі рабамі, так і ў рабстве ў былых азіяцкіх калоніях.
У 2020 годзе Вілем-Аляксандр папрасіў прабачэння ў Інданезіі за «празмерны гвалт» падчас галандскага каланіяльнага кіравання.
У снежні прэм'ер-міністр Марк Рутэ прызнаў, што галандская дзяржава нясе адказнасць за атлантычны гандаль рабамі, і папрасіў прабачэння за тое, што краіна нажывалася на ім.
Рутэ заявіў, што ўрад не будзе выплачваць рэпарацыі, як рэкамендавала кансультатыўная група ў 2021 годзе.
У снежні каралеўскі дом даручыў правесці незалежнае расследаванне ролі каралеўскай сям'і ў каланіяльнай гісторыі, вынікі якога чакаюцца ў 2025 годзе.
Цяпер чытаюць
Гэты беларус даследуе рак — вось што ён кажа пра SPF ад меланомы, навуковы прагрэс і самы складаны ў лячэнні рак3
Каментары