Стыльскі расказаў пра сустрэчу з дарослым сынам: Думаў, нейкае радыё проста ўгарае
У 2014 годзе панк-рокер Юрый Стыльскі, лідар брэсцкага гурта «Дай Дарогу!», даведаўся, што ў яго ёсць 15-гадовы сын Антоніа. У інтэрв'ю «ТОК» Юрый падзяліўся абставінамі першай сустрэчы з хлопцам.
Магчымасць сустрэцца з сынам з’явілася, калі ён і яго маці прыехалі ў Пінск, адкуль тая родам. Стыльскі згадвае, што было далей: «Яна кажа: калі хочаш, можаш прыязджаць, пазнаёмішся. А я да гэтага хацеў яшчэ даведацца, ці насамрэч яно так ёсць, што гэта — маё дзіця. І я вырашыў сам, што прыеду і пазнаёмімся, усё-ткі сын. Яны ў Італіі жывуць і дагэтуль, і я ўсё-ткі, атрымліваецца, падрэ. Я прыехаў. Падняўся хлопец, яшчэ вышэйшы за мяне, па-мойму, чао-какао. Ведае тры мовы — французскую, рускую, італьянскую. Мы нешта паелі».
Далей Стыльскі адвозіў сына і яго маці ў аэрапорт, і тыя паляцелі ў Геную. Цяпер музыкант і яго сын падпісаныя адзін на аднаго ў інстаграме і часам перапісваюцца. Юрый дзеліцца, што так і не здолеў пасябраваць з сынам настолькі добра, наколькі хацеў бы.
Чаму жанчына не сказала яму пра сына раней, а чакала 15 гадоў? Стыльскі адказвае:
«У яе ўсе сваякі — міліцыянеры. Яна так мне і казала: «Маўляў, бо я была непаўналетняя, а тады мне не хацелася ніякага вяселля, ніякіх шкарпэтак і чагосьці такога бытавога, мне было прасцей прамаўчаць, не выдаваць цябе». Нібыта я атрымаў бы нейкае пакаранне за ўсё гэта.
Яна ад мяне адраклася ў той момант, і мне тады ўвогуле не было гэта патрэбна. Нібыта, гледзячы на мяне і мой лад жыцця, я быў для яе нейкі ледзьве не бессаромны ці нешта накшталт гэтага, яна прыняла за мяне рашэнне, што яна застанецца там, а я — тут. Хаця, гледзячы на адзін яе расказ, яна мне ў нейкі момант нібыта перадавала прывітанне і казала, што яна з-за мяне ў гэтай сітуацыі няпростай, але яно нібыта да мяне не даляцела».
Мужчына даведаўся пра дзіця па тэлефоне і насамрэч думаў, што гэта жарт.
«Радыё «Рокс», радыё «Сталіца» ці радыё «Бі-эй» проста ўгарае і хоча павесіць на мяне такую адказнасць, маўляў, што зробіць Юрый Стыльскі, зараз мы даведаемся», — вырашыў ён тады.
Але потым жанчына, маці сына, пацвердзіла яму, што гэта не жарт. Сказала, што прыйшоў час і ёй проста стала патрэбна даведацца ДНК бацькі сына і ці ёсць у яго нейкія хваробы, што перадаюцца ў спадчыну, таму што хлопец хоча стаць футбалістам. І потым прапанавала падтрымліваць сувязь, што адбываецца і дагэтуль.
Цікава, што пасля таго выпадку Стыльскаму ў дырэкт пачало пісаць шмат людзей, якія называлі сябе яго згубленымі дзецьмі. Сам музыкант, аднак, ставіцца да гэтага з гумарам і лічыць з’яву пазітыўнай.
«Наша Нiва» — бастыён беларушчыны
ПАДТРЫМАЦЬТоп-30 самых сэксуальных беларускіх мужчын ад «Нашай Нівы»
Юрый Стыльскі — пра сустрэчу з дарослым сынам, алкаголь, грошы і голыя карціны
«Манцірую сцэны для Rammstein, працую грузчыкам». Аляксандр Памідораў расказаў, як яму жывецца ў эміграцыі
Цяпер чытаюць
Жыхары Грушаўкі і Міхалова застаюцца без дэпутаткі: чэмпіёнка Мірончык-Іванова збіраецца ў дэкрэт15
Каментары