Устаноўкі «Пэтрыёт» могуць дапамагчы Украіне, але звязаныя з гэтым рызыкі для НАТА
Адміністрацыя прэзідэнта ЗША Байдэна, магчыма, пагадзілася перадаць Украіне зенітныя ракетныя комплексы «Пэтрыёт», але гэта рашэнне можа стварыць праблемы для абароны НАТА, піша ў калонцы для брытанскай Guardian эксперт Каралеўскага аб'яднанага інстытута абаронных даследаванняў (RUSI) Джэк Уотлінг.
«Пэтрыёт» — адна з самых магутных у свеце сістэм супрацьпаветранай і супрацьракетнай абароны. <…> Акрамя абароны ўкраінскіх гарадоў, прадастаўленне такіх сродкаў СПА сярэдняй далёкасці можа таксама вызваліць частку магчымасцяў для ўкраінскіх ракетных сістэм С-300, пашырыўшы даступнае паветранае прыкрыццё над лініяй фронту», — піша Уотлінг.
Пры гэтым ён адзначае, што сістэмы «Пэтрыёт» не забяспечаць неадкладную абарону Украіны — гэта складаная сістэма як з пункту гледжання эксплуатацыі, так і абслугоўвання, і для таго, каб яна запрацавала ва Украіне, патрэбны час.
Украіна ўсё больш залежыць ад дапамогі партнёраў у галіне артылерыйскіх боепрыпасаў і бранятэхнікі, але такая залежнасць можа абярнуцца рызыкай, паколькі запасы менавіта гэтай ваеннай дапамогі абмежаваныя і патрэбныя самім заходнім саюзнікам.
Попыт на ракеты для «Пэтрыёт» ёсць і ў партнёраў ЗША, напрыклад, Швецыі і Саудаўскай Аравіі, піша Уотлінг. Апошняя штомесяц мае патрэбу ў іх для абароны ад удараў з боку хусітаў. Аб'ёмы ж вытворчасці ракет застаюцца нізкімі, адзначае Уотлінг.
«Аслабелая абаронная прамысловасць НАТА пакінула альянс у дрэнным становішчы для падтрымкі працяглых высокаінтэнсіўных аперацый. У выпадку такіх сістэм, як «Пэтрыёт», задача ўскладняецца, паколькі вытворчасць такой высокадакладнай зброі, як ракеты СПА, займае значна больш часу, чым вытворчасць некіравальных артылерыйскіх снарадаў», — піша Уотлінг.
Па даных амерыканскіх СМІ, ЗША ў бліжэйшы час ухваляць пастаўку сістэм «Пэтрыёт» Украіне. Гэтыя звесткі пакуль не пацверджаны афіцыйна.
Каментары