Нечакана вызвалены лынтупскі ксёндз Аляксандр Баран. Два дні ён не дасядзеў у ізалятары
Увечары 6 красавіка выйшаў на волю пробашч каталіцкай парафіі Святога Апостала Андрэя ў Лынтупах ксёндз Аляксандр Баран. Яго адпусцілі з ізалятару раней тэрміну, бо па рашэнні суда, які прызначыў святару 10 сутак арышту, Барана павінны былі вызваліць 8 красавіка, піша katolik.life.
Ужо 7 красавіка ксёндз цэлебраваў у касцёле святую Імшу. А пра канкрэтныя абставіны яго вызвалення пішуць наступнае:
«Святара з камеры выклікалі на размову. Сказалі, што, відаць, цяпер шмат спраў перад святамі — наперадзе Пальмовая нядзеля і Вялікі Тыдзень, а затым Пасха — і без тлумачэння прычын і каментароў вызвалілі».
Іншыя падрабязнасці раптоўнага вызвалення пакуль невядомыя. Парафіяне мяркуюць, што на такое рашэнне паўплываў грамадскі рэзананс і моцная малітва за святара, якую ладзілі ў парафіі, а таксама святары і вернікі з усёй Беларусі.
Ксёндз Баран быў затрыманы 25 сакавіка і правёў трое сутак пад вартай. Пасля заканчэння 72-гадзіннага тэрміну затрымання, у панядзелак, 28 сакавіка ён быў пакінуты пад вартай яшчэ на 72 гадзіны.
30 сакавіка святара выпусцілі, уручыўшы позву на судовае пасяджэнне на 4 красавіка. А ў гэты дзень яго зноўку затрымалі.
Меркавалася, што затрыманне ксяндза было звязана з яго ўдзелам у акцыях салідарнасці ў жніўні 2020 года, калі ён разам са сваімі парафіянамі выходзіў на вуліцу насупраць касцёла з кветкамі ў руках, такім чынам пратэстуючы супраць гвалту.
Фармальна ж ксяндза Аляксандра асудзілі за «несанкцыянаванае пікетаванне» і «распаўсюд экстрэмісцкіх матэрыялаў». Ён сам віны не прызнаў, аднак суд усё роўна прызнаў яго вінаватым.
Цяпер чытаюць
Максім Знак: Мы з Ціханоўскай зайшлі падаваць скаргу ў кабінет Ярмошынай — але Ярмошынай там не было59
Каментары