Даверанай асобай Канапацкай стаў пралукашэнкаўскі палітолаг і эксперт «Спутніка» з «Імхаклабам»
Адной з давераных асобаў Ганны Канапацкай на выбарах-2020 стаў палітолаг Павел Патапейка. Гэта незвычайная асоба ўпершыню апынулася сярод прыхільнікаў «апазіцыі».
Патапейку 45 гадоў, ён выпускнік факультэта міжнародных адносінаў БДУ, абараніў кандыдацкую дысертацыю па канфлікце ў Паўночнай Ірландыі. Складана знайсці дзяржаўную ўстанову, дзе Патапейка — прынамсі па яго словах — не працаваў. Міністэрства замежных спраў, Міністэрства культуры, Міністэрства транспарту і камунікацый, апарат Палаты прадстаўнікоў, Інфармацыйна-аналітычны цэнтр пры Адміністрацыі прэзідэнта, Акадэмія навук…
Патапейка пастаянна з'яўляўся ў эфіры дзяржаўных тэлеканалаў і на старонках дзяржаўных газет як пралукашэнкаўскі палітолаг.
«Зноў адно і тое ж відовішча, зробленае па банальных лякалах. Рэжысёры дзейства, спрацавала ва Украіне, відавочна пакутуюць на крызіс крэатыву», — казаў палітолаг пра Дзень Волі — 2017.
«Калі выкарыстоўваюць санкцыі, як у інтэрнэце кажуць «забанілі», вось такія рэчы на ўзроўні дзяржаў — гэта дзіцячае глупства. Санкцыі нічога ніколі не давалі нікому. У нас свая лінія. У Амерыцы гэта цэняць і разумеюць. Мы сваю лінію вытрымалі, мы выстаялі. Мы зрабілі тое, што хацелі. А мы не хацелі надта многага. Мы проста хацелі, каб нас паважалі і мы проста працягвалі сваю лінію», — у мінулым годзе аналізаваў Патапейка беларуска-амерыканскія адносіны.
Адначасова з гэтым давераная асоба Канапацкай — пастаянны аўтар і эксперт расійскіх «інтэграцыйных» рэсурсаў «Спутнік», «Саюзны наратыў», «Еўразія. Эксперт», «Імхаклаб».
На «Імхаклабе» ў яго больш за 50 артыкулаў.
Павел Патапейка адмовіўся каментаваць сітуацыю карэспандэнту «Нашай Нівы» — рабіў выгляд, што едзе ў метро і не можа размаўляць.
Каментары