Комплекс у вёсцы Александрыя-2, які мясцовыя называюць «рэзідэнцыяй прэзідэнта», насамрэч належыць звязанай з бізнэсменам Аляксеем Алексіным кампаніі «Белнафтагаз». Гэта вынікае з даных адзінага дзяржрэгістра нерухомай маёмасці Беларусі. Акрамя гэтага комплексу, у вёсцы прыкладна на 30 двароў знаходзіцца бацькоўскі дом Аляксандра Лукашэнкі, а ў канцы 2019 года тут адкрылася ганаровае консульства Грузіі, якое ўзначальвае яшчэ адзін уплывовы бізнэсовец — Сяргей Цяцерын. Як усё гэта выглядае, распавядае TUT.BY.
Што гэта за Александрыя-2?
Вёска Александрыя ў Шклоўскім раёне падзелена на дзве часткі: старая і новая, як кажуць старажылы. Падзяляе іх чыгунка — на мяжы знаходзіцца аднайменная чыгуначная станцыя. Вонкава дзве часткі вёскі таксама трохі адрозніваюцца.
Александрыя-2 прыкладна на 30 двароў уяўляе сабой дзве невялікія вуліцы, якія ўтвараюць кола. У яго цэнтры — яблыневы сад.
Тут ідэальна роўныя дарогі, узорныя домікі ААТ «Александрыйскае», некалькі дамоў больш старых, крама, лазня і адноўленая бацькоўская хата Аляксандра Лукашэнкі.
Як выглядае комплекс, які называюць «рэзідэнцыяй»
Практычна насупраць яе — комплекс з дзясяткам камер назірання і без апазнавальных знакаў на беразе ракі. Вось яго прыкладныя межы:
На тэрыторыі, якая праглядаецца не цалкам, размешчана некалькі аднапавярховых будынкаў, якія нагадваюць гасцявыя дамы, і двухпавярховы драўляны катэдж. Ёсць тут таксама лазня і альтанкі. Побач з комплексам — верталётная пляцоўка.
Цераз плот ад катэджа — закрытая плотам з шчыльнай сеткай спартыўная пляцоўка. Яна падзелена на зоны для гульні ў баскетбол, валейбол, вялікі тэніс і міні-футбол. У вызначаныя гадзіны тут можна займацца бясплатна ўсім ахвотным.
Мясцовыя кажуць, што ў гэтым комплексе спыняецца Аляксандр Лукашэнка, а таксама прымае гасцей, якія прыязджаюць, напрыклад, на свята Купалле. Таму жыхары Александрыі называюць гэта месца рэзідэнцыяй прэзідэнта. Але, як аказалася, гэта не так.
Гэты зямельны ўчастак плошчай 3,15 гектара на праве арэнды належыць кампаніі «Белнафтагаз», якая звязаная з буйным і ўплывовым бізнэсменам Аляксеем Алексіным. Яму сярод іншага таксама падкантрольная кампанія «Энерга-Оіл», якая займаецца «Табакеркамі», і МТБанк.
Што ж тычыцца комплексу ў Александрыі, то гэтая зямля перададзена ў арэнду «Белнафтагаз» з 2012 па 2111 гады. Гадавая арэндная плата — 758 рублёў. Мэтавае прызначэнне ўчастка — для будаўніцтва і абслугоўвання аб'екта «Комплекс па абслугоўванні дэлегацый у вёсцы Александрыя-2». Сам комплекс таксама належыць «Белнафтагазу».
У 2019 годзе гэтай кампаніі таксама быў прадстаўлены суседні ўчастак у 0,7 гектара для будаўніцтва дома гасцінічнага тыпу, які ўжо практычна завершаны.
Гадавая арэндная плата за гэтую зямлю — 286 рублёў. Тэрмін арэнды — да восені 2118 года.
А што ўяўляе сабой ганаровае консульства Грузіі?
Недалёка ад комплексу «Белнафтагаз» размешчаны яшчэ адзін цікавы аб'ект — пабудаваны ў 2015 годзе дом бізнэсмена, кіраўніка Беларускай тэніснай федэрацыі і ганаровага консула Грузіі ў Беларусі Сяргея Цяцерына. Менавіта тут у канцы 2019 года ён адкрыў ганаровае консульства гэтай краіны.
Кампаніі Цяцерына займаюцца дыстрыбуцыяй прадуктаў і алкаголю, грамадскага харчавання (як мінімум — бар «Свабоды, 4»), а таксама збіраюцца будаваць шматфункцыянальны комплекс насупраць Палаца незалежнасці ў Менску. Бізнэсмен вядомы таксама тым, што далучыў Аляксандра Лукашэнку да вялікага тэніса.
Дом Цяцерына ў Александрыі мае агульную плошчу ў 160 квадратных метраў. Размешчаны на ўчастку ў 0,24 гектара.
Па суседстве з аб'ектамі Цяцерына і «Белнафтагазу» стаяць дамы, якія належаць ААТ «Александрыйскае».
Мяркуючы па ўсім, там жывуць работнікі гаспадаркі. Каля аднаго з іх стаіць Audi 80 з пачатку 90-х. Каля іншых — часам паркуюцца прэстыжныя машыны з канца 2010-х.
Цяпер чытаюць
На вайсковыя зборы масава забіраюць гродзенцаў. А што мінчукі? Падрыхтуйцеся, ваша чарга — 2027‑2028 гады5
Каментары