Галоўны рэдактар расійскай радыёстанцыі «Эхо Москвы» Аляксей Венядзіктаў патлумачыў, што зменіцца з прызначэннем Дзмітрыя Мезенцава новым паслом у Беларусі і як замена пасла звязаная з арыштам намесніка кіраўніка Рады бяспекі краіны Андрэя Уцюрына.
Па словах журналіста, задачы перад Мезенцавым будуць стаяць тыя ж, што стаялі перад яго папярэднікам Міхаілам Бабічам.
«Стылістыка зменіцца. Насамрэч, задачы не змяняюцца. Яны вызначаны былі яшчэ некалькі гадоў таму. Па эўфемізмах Дзмітрыя Мядзведзева, гэта глыбокія інтэграцыйныя працэсы… З палітычнага пункту гледжання, гэта збліжэнне Расіі і Беларусі ў мэтах ператварэння ў адзіную эканамічную і палітычную прастору».
Арышт за хабар Андрэя Уцюрына, які доўгі час ахоўваў Аляксандра Лукашэнку, у тым ліку 7 гадоў кіраваў яго асабістай аховай, — гэта дэманстрацыя Маскве.
«Цалкам відавочна мне, чаму Пуцін прыняў рашэнне адхіліць, забраць пасла Бабіча. Андрэй Уцюрын быў візаві пасла Бабіча. Цалкам законна, будучы намеснікам дзяржсакратара Рады бяспекі, ён меў сувязі з расійскім паслом. Мабыць, штосьці такое казалі, што было пакладзена на стол прэзідэнту Беларусі, што ён і прад'явіў Пуціну… Разумеем, якія ў яго могуць быць сувязі, уплывы. І ідуць розныя чуткі — ад змовы супраць Лукашэнкі да «перахопу» на выбарах (выбары ж прэзідэнта хутка ў Беларусі). Але ў любым выпадку зразумела, што такі дэманстратыўны арышт Уцюрына — гэта ў першую чаргу яго сувязі з РФ».
Ён мяркуе, што ў справе Уцюрына сувязі з Расіяй фігураваць не будуць.
«Яму, напэўна, фармальна гэтага прышываць не будуць, таму што гэта ганьба, калі кіраўнік Рады бяспекі нешта там рабіў і перадаваў нейкую інфармацыю. Ці абмяркоўваў нейкія планы стратэгічныя і тактычныя. Але гэта дэманстрацыя, безумоўна, перад РФ, што мы ўсё ведаем, мы вас слухаем. І вось Бабіча вы забралі, а гэтага мы арыштавалі. Гэта гісторыя яшчэ дэманстратыўная… Што чалавек, асабіста блізкі да прэзідэнта Лукашэнкі. Не ўратуе, калі вы будзеце з Расіяй вадзіцца. Так адкрыта», — сказаў на заканчэнне журналіст.
Каментары