Імя яшчэ аднаго затрыманага па «справе патрыётаў» — Віктар Мароз. Ён кіруе адной зь менскіх фірмаў, якая займаецца дыстрыбуцыяй. Увечары бацьку Віктара Мароза паведамілі з КДБ, што сына затрымалі на 3 дні паводле падазрэньняў у 3 частцы 293 артыкулу — падрыхтоўка да ўдзелу ў масавых беспарадках, паведамляе »Радыё Свабода».
«У сваякоў застаецца надзея, што хлопца выпусьцяць без затрыманьня. Юнаком ён уваходзіў у «Белы легіён», але тое было даўно», — сказала Ніна Шыдлоўская.
Паводле яе словаў, у КДБ чыняць пэўны ціск на Міраслава Лазоўскага.
«Можна казаць пра псыхалягічны і маральны ціск. Паміж допытамі да яго прыходзяць супрацоўнікі камітэту, праводзяць розныя гутаркі, ціснуць маральна, і практычна з гэтай прычыны ён сябе вельмі кепска адчувае. У яго галаўны боль, ня можа спаць. Тое, што паміж допытамі не павінна быць ніякіх дзеяньняў без удзелу адваката — гэта не вытрымліваецца», — кажа Ніна Шыдлоўская.
Як складаюцца лёсы астатніх затрыманых?
«Дакладных зьвестак няма, але адзін з адвакатаў сказаў у прыватнай гутарцы: «Калі 10 дзён, якія дазволена трымаць без абвінавачаньня, мінулі, а чалавек ня выйшаў на волю — значыць, таксама выставілі абвінавачаньні, толькі пра гэта яшчэ невядома. Але мы спадзяёмся, што пра некага гэты прагноз дакладна не пацьвердзіцца», — сказала Ніна Шыдлоўская.
У КДБ зьвесткі пра выстаўленьне абвінавачаньняў затрыманым у справе «Белага легіёну» не камэнтуюць.
Каментары