Міратворцы Арганізацыі Аб'яднаных Нацый (ААН) выявілі ў Афрыцы паўночнакарэйскую зброю, якая знаходзіцца пад абмежавальнымі мерамі міжнароднай арганізацыі.
Гэта вынікае з ўнутранага дакладу ААН, з якім азнаёмілася Associated Press.
Як высветліла група экспертаў ААН па Паўночнай Карэі, у жніўні 2016 году каля 30 тыс. гранатамётаў знайшлі схаванымі пад жалезнай рудой на грузавым судне, якое накіроўвалася па Суэцкім канале ў Егіпет.
Куды зброю збіраліся даставіць, эксперты не выявілі, аднак падкрэслілі, што гэта «самы вялікі захоп боепрыпасаў у гісторыі санкцый» супраць Паўночнай Карэі.
За месяц да гэтага, гаворыцца ў дакладзе, дзяржава — член ААН перахапіла паветраную перавозку прыбораў ваеннага прызначэння для радыёсувязі, прызначаную для нейкай кампаніі ў Эрытрэі.
Гэта ўжо другі раз, калі арганізацыя выяўляе факты ваеннага экспарту з Паўночнай Карэі ў Эрытрэю, што «пацвярджае супрацоўніцтва ў сферы ўзбраенняў паміж дзвюма краінамі».
Таксама арганізацыя выявіла паўночнакарэйскіх вайскоўцаў у Анголе і Угандзе.
Гадавая справаздача, падрыхтаваная групай экспертаў ААН па Паўночнай Карэі, паказвае, што Пхеньян ухіляецца ад санкцый, уведзеных у дачыненні да яго ядзернай і ракетнай праграм, займаецца трэніроўкай сваіх вайскоўцаў і пастаўляе ўзбраенне.
На думку эксперта па Паўночнай Карэі ў Інстытуце міжнароднай эканомікі Петэрсана Марка Нолана, КНДР «выкарыстоўвае афрыканскія краіны ў якасці стратэгіі абыходу».
Ён растлумачыў, што Пхеньян наладжвае сваю вайсковую прысутнасць у Афрыцы і праяўляе цікавасць да гандлю там для таго, каб скараціць сваю залежнасць ад Кітая.
У дачыненні да Паўночнай Карэі дзейнічаюць санкцыі як міжнародных арганізацый і саюзаў, такіх як ААН і ЕС, так і асобных краін, у тым ліку ЗША і Расіі. Абмежавальныя меры былі ўведзеныя пасля шматлікіх ядзерных і ракетных выпрабаванняў, якія праводзіць Пхеньян. Самі санкцыі закранаюць эканамічную, фінансавую, ваенную, а таксама дыпламатычную і палітычную сферы.
Цяпер чытаюць
Усе гадаюць, чаму Месяц змяніў сваё становішча на небе. Спыталі ў астранома, што адбываецца2
Усе гадаюць, чаму Месяц змяніў сваё становішча на небе. Спыталі ў астранома, што адбываецца
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)1212
Каментары