Канадскі прэм'ер абяцае захоўваць ціск на Крэмль незалежна ад пазіцыі Трампа
На фоне паведамленняў СМІ пра магчымае пацяпленне адносін паміж Белым домам і Крамлём пры прэзідэнце Дональдзе Трампе Канада будзе прытрымлівацца папярэдняга курсу.
Пра гэта паведаміла, спасылаючыся на словы прэм'ер-міністра краіны Жустэна Трудо, агенцтва VICE News.
«Мы адкрыта казалі, што расійская інтэрвенцыя ва Украіне непрымальная, і мы працягнем казаць гэта і падтрымліваць Украіну ў яе барацьбе з агрэсіяй», — сказаў Трудо.
Прэм'ер адзначыў, што не выключае кантактаў з Масквой па тых пытаннях, дзе дзве дзяржавы маюць агульныя інтарэсы: «арктычнае супрацоўніцтва, контртэрарызм, у тым ліку занепакоенасць вакол Бліжняга Усходу, дзе ёсць магчымасці як мінімум мець канструктыўны дыялог з Расіяй».
Аднак, па ягоных словах, «мы не адмовімся ад асуджэння незаконных і шкодных дзеянняў, якія Расія зрабіла ва Украіне».
Каментары