Дзве апазіцыйныя партыі перамагаюць на выбарах у літоўскі сойм.
Саюз бацькаўшчыны — Хрысціянскія дэмакраты Літвы набраў 21,7% галасоў. Іх ачольвае ўнук Вітаўтаса Ландсбергіса Габрыэлюс.
У Літоўскага саюза сялян і зялёных (ЛССЗ) — 21,6%. Некалі Саюз сялян узначальвала Казіміра Прунскене, цяпер на чале яго стаіць харызматычны Рамунас Карбаўскіс.
Кіруючыя сацыял-дэмакраты прэм'ера Буткявічуса маюць 14,4%, Рух лібералаў — 9%. У Сойм праходзяць таксама Выбарчая акцыя палякаў Літвы / Саюз хрысціянскіх сем'яў — 5,5% і «Парадак і справядлівасць» — 5,3%.
Цікава, што Выбарчая акцыя палякаў Літвы мае цесныя сувязі з Масквой і менавіта ад яе ў Сойм балатаваліся актывісты расійскай дыяспары.
За Партыю працы, што таксама ўваходзіла ва ўрадавую кааліцыю, прагаласавалі 4,7% выбаршчыкаў і, такім чынам, яна не праходзіць у Сойм. Мінімальны бар'ер для партый складае 5%.
ЛССЗ, які называе сябе цэнтрысцкай сілай, сцвярджае, што адкрыты для перамоваў аб стварэнні кааліцыі як з правымі, так і з левымі. Пагадненні магчымыя толькі пасля другога тура выбараў, які адбудзецца 23 кастрычніка. Тады стануць вядомыя пераможцы па аднамандатных акругах.
Каментары