На менскія экраны выйшаў доўгачаканы працяг прыгодаў слыннага археоляга «Індыяна Джонз і Каралеўства Крышталёвага Чэрапу» (Indiana Jones and the Kingdom of the Crystal Skull). Піша Андрэй Расінскі.
Індыяна Джонз і Каралеўства Крышталёвага Чэрапу (Indiana Jones and the Kingdom of the Crystal Skull)
ЗША, 2008, каляровы, 124 хв.
Рэжысэр: Стывэн Сьпілбэрг
Ролі выконваюць: Гарысан Форд, Кэйт Бланшэт, Карэн Алэн, Шая ЛаБаф, Рэй Ўінстан, Джон Гёрт
Жанр: Прыгоды
Адзнака: 7,5 (з 10)
Археоляг Індыяна Джонз адпраўляецца ў амазонскія джунглі на пошукі крышталёвага чэрапа – а заадно знаходзіць жонку й сына. Героям перашкаджае гарная ўкраінская камуністка (Кэйт Бланшэт) з эсэсаўскімі звычкамі і гэбоўскай арміяй…
20 гадоў таму трылёгія пра Індыяну Джонза, прыдуманая Сьпілбэргам і Лукасам, увайшла ў скарбонку кінэматографу і сталася недасягальным узорам для прыгодніцкіх стужак. Знакаміты археоляг быў героем і ўдалага тэлевізійнага цыклю, дзе паказваліся прыгоды юнага Індыяны. А актор Гарысан Форд, які намаляваў вобраз амэрыканскага прафэсара-авантурніка зь фірмовым бізуном і каўбойскім капелюшом, пасьля трылёгіі зрабіўся міліярдэрам.
Індыяна вярнуўся, хаця й пастарэў разам з намі. Але ў 1957 годзе ён усё яшчэ ў выдатнай прыгодніцкай форме – выжывае пасьля ядравага выбуху (!), вядзе рукапашныя баі, расшыфроўвае піктаграмы й ганяе на матацыклах. Толькі цяпер ягоныя супернікі не нацысты, а камуністы.
Калярытная Ірына Спалко ў чорных пальчатках да локця і з шабляй, Герой Сацыялістычнай працы, якая на загад “вялікага Сталіна” швэндаецца па сьвету ў пошуках паранармальных артэфактаў – гэта падарунак ад Кэйт Бланшэт, за што камуністы мусяць паставіць ёй помнік. Ніводная сталіністка на экране не была такой гратэскна-стылёвай, падцягнута-ваяўнічаю і апантанаю. “Дыцятко маё!” – схіляецца яна над муміфікаванымі парэшткамі пачвары, зь ледзяным позіркам загадвае забіць ворага й гарыць сінім полымем у неадольнай празе “ведаць усё”.
Папрокі за недасканалую ўкраінскую мову (у карузьлівым расейскім дубляжы), закіды за неадпаведнасьць датам (які Сталін у 57-ым годзе!) і зьдзіўленьне, што ў дзікіх лясох гэбоўцы носяць адпрасаваную савецкую форму – адкідаюцца.
Стужка Сьпілбэрга – атракцыён зь людажэрамі-мурашамі, баявымі малпамі (прывітаньне “Тарзану”), ашчэранымі муміямі й іншаплянэтнымі таямніцамі.
У забаўляльным кактэйлі дасьціпныя сямейныя звады (Карэн Алэн – Мэрыян зь першай часткі), намёкі на “Бесклапотнага ездака” – і галаваломныя аўтамабільныя трукі, якія Форд выконваў сам. І хаця не стае часам былога моладзевага шарму, сьпісваць Індыяну Джонза зарана. Ягоны сын – Шая ЛаБаф з “Трансформэраў” – не дарос да слыннага капелюша археоляга.
Сэансы ў менскіх кінатэатрах.
P.S. Гісторыя з камуністамі мела працяг.
Цяпер чытаюць
У мінскім метро праходзяць выпрабаванні новыя цягнікі ФОТЫ1
Каментары