Касманаўт Алег Навіцкі аформіў дакументы яшчэ да заканчэння грамадскага абмеркавання праекта.
23 лістапада 2015 года ў Мінску пачалося грамадскае абмеркаванне забудовы квартала ў Вяснінцы. Яго яшчэ называюць «Дразды-2».
Улада пыталася, ці згодныя людзі на змены ў папярэднім праекце забудовы. Асноўныя змены датычылі новых сацыяльна- забаўляльных аб’ектаў: гатэля, тэніснага цэнтра і цэнтра мастацкай гімнастыкі. Але заадно прапаноўвалася «нарэзаць» яшчэ пяць участкаў для будаўніцтва катэджаў. У «Драздах-2» і так жыве каля паўсотні высокіх чыноўнікаў, а цяпер у іх шэрагах чакалася папаўненне. Падчас грамадскага абмеркавання мінчукі, чые прыватныя дамы ў іншых раёнах сталіцы ідуць пад знос, звярнуліся да ўладаў з просьбай выдзеліць свабодныя ўчасткі ім.
Прадказальна, іх прапанова засталася без увагі. Рынкавы кошт пустога надзела ў «Драздах-2» сягае паўмільёна даляраў, хто ж зробіць такі падарунак простым людзям?
Ужо 26 лістапада 2015 Мінгарвыканкам прыняў рашэнне №3244, паводле якога адзін з новаўтвораных надзелаў у водаахоўнай зоне выдзяляўся касманаўту беларускага паходжання, Герою Расіі Алегу Навіцкаму.
Грамадскае абмеркаванне яшчэ працягвалася, а Навіцкі ўжо паспеў аформіць дакументы. Касманаўт не мае беларускага грамадзянства, таму зямлю ва ўласнасць яму не далі. З ім была заключаная дамова арэнды. Паводле яе, Навіцкі арандуе зямлю ў «Драздах-2» на 98,5 года. За 15 сотак яму штогод давядзецца плаціць 3,4 мільёна рублёў. Прычым сума не будзе індэксавацца. Пара гадоў — і гэта стануць капейкі.
Упершыню пры выдзяленні элітных участкаў Мінгарвыканкам прымяніў арэндную схему. Раней надзелы афармляліся ва ўласнасць ці выдаваліся ў пажыццёвае спадчыннае валоданне. Гэта датычыла і замежнікаў. Напрыклад, дзяржаўны сакратар так званай «саюзнай дзяржавы», грамадзянін Расіі Грыгорый Рапота, які больш за 30 гадоў свайго жыцця аддаў замежнай выведцы ў савецкім КГБ і расійскім ФСБ, зможа перадаць дом у «Драздах-2» сваім дзецям.
* * *
Алег Навіцкі нарадзіўся 12 кастрычніка 1971 у Чэрвені. Скончыў Качынскую авіяцыйную вучэльню (1994) і Вайскова-паветраную акадэмію імя Гагарына (2006). У 1995—2007 служыў лётчыкам, камандзірам звяна, камандзірам авіяцыйнай эскадрыллі расійскага паветранага войска. У 2009 атрымаў кваліфікацыю касманаўта-выпрабавальніка.
Здзейсніў палёт у космас у 2012—2013, працаваў на борце Міжнароднай касмічнай станцыі 143 дні. Герой Расіі (2014).
Жыве ў Звёздным гарадку ў Падмаскоўі. Жонка — Юлія Навіцкая, журналіст часопіса «Солдаты Россіі». Мае дачку.
* * *
Алег Навіцкі: «Я беларус»
«Вядома, я — беларус. Люблю сваю радзіму, беларускую мову люблю. Усюды, дзе служыў, ведалі, што я беларус. У мяне на стале стаіць беларускі сцяжок. Калі мы адправіліся ў палёт, касманаўты сказалі: «Вось, яшчэ адзін беларус паляцеў». Я браў з сабой на арбіту наш дзяржаўны сцяг, сцяг Мінскай вобласці і Чэрвеня».
* * *
Юлія Навіцкая, жонка: «Ён грамадзянін Расіі і расійскі касманаўт»
«Некаторыя пішуць, што Навіцкі — першы касманаўт суверэннай Беларусі. Мне здаецца, гэта не зусім карэктна. Алег паступіў у лётнае вучылішча ў 1988 годзе, адпаведна, у 1988 годзе ён з’ехаў з Беларусі. Ён даваў прысягу яшчэ Савецкаму Саюзу і пасля распаду СССР застаўся ў Расіі. Ён грамадзянін Расіі і стаў расійскім 114-м касманаўтам».
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА18
Каментары