Аляксандр Лукашэнка і Ільхам Аліеў абавязаліся садзейнічаць развіццю палітычнага дыялогу паміж Беларуссю і Азербайджанам, умацаванню высокага ўзроўню даверу, узаемаразумення і шматпланавага супрацоўніцтва. Пра гэта гаворыцца ў сумеснай дэкларацыі, якую яны падпісалі па выніках перамоў у Мінску 28 лістапада.
Сустрэча Лукашэнкі і Аліева прайшла ў вузкім і пашыраным складах.
Кіраўнікі дзяржаў таксама ўзялі на сябе абавязацельствы «ўсяляк нарошчваць дасягнуты высокі ўзровень беларуска-азербайджанскіх адносінаў, заснаваных на традыцыях узаемнай павагі і дружбы паміж народамі»
Падкрэсліваючы важнасць далейшага развіцця ўзаемадзеяння дзвюх краін на міжнароднай арэне, Лукашэнка і Аліеў, зазначаецца ў дэкларацыі, будуць садзейнічаць паглыбленню супрацоўніцтва і каардынацыі намаганняў па аказанні ўзаемнай падтрымкі ў сферы знешняй палітыкі. Пры гэтым пацвярджаецца супадзенне і блізкасць пазіцый па многіх пытаннях міжнароднай тэматыкі.
Абодва кіраўнікі таксама абавязаліся «садзейнічаць інтэнсіфікацыі працы ўрадаў Беларусі і Азербайджана па рэалізацыі традыцыйных і пошуку новых форм эканамічнага супрацоўніцтва ў перспектыўных сферах узаемадзеяння, якія ахопліваюць машынабудаванне, транспарт, сельскую гаспадарку, сувязь, ахову здароўя, адукацыю і навуку».
Апрача таго, у дэкларацыі гаворыцца, што «бакі будуць садзейнічаць пашырэнню сувязей і кантактаў паміж творчымі саюзамі і аб'яднаннямі, дзеячамі культуры, літаратуры і мастацтва, маладзёжнымі арганізацыямі, захаванню нацыянальнай самабытнасці народаў дзвюх краін».
У прысутнасці кіраўнікоў дзяржаў быў падпісаны дагавор аб сацыяльна-эканамічным супрацоўніцтве Беларусі і Азербайджана да 2025 года і праграма сацыяльна-эканамічнага супрацоўніцтва дзвюх краін на гэты ж перыяд. Дакументы накіраваныя на далейшае ўмацаванне і дыверсіфікацыю гандлёва-эканамічных сувязей на аснове ўзаемных інтарэсаў, а таксама якаснае паляпшэнне жыцця насельніцтва дзвюх краін.
Апрача таго, Міністэрствам працы і сацыяльнай абароны Беларусі і Дзяржаўным фондам сацыяльнай абароны Азербайджана падпісаны пратакол аб супрацоўніцтве ў сферы абавязковага дзяржаўнага сацыяльнага страхавання.
Пагадненне аб супрацоўніцтве падпісалі нацыянальныя акадэміі навук дзвюх краін, Беларускі рэспубліканскі фонд фундаментальных даследаванняў і Фонд развіцця навукі пры прэзідэнце Азербайджана.
На думку Лукашэнкі, рэалізацыя падпісаных дакументаў будзе садзейнічаць далейшаму пашырэнню ўзаемавыгадных беларуска-азербайджанскіх сувязей у палітычным, гандлёва-эканамічным, навукова-тэхнічным і гуманітарным супрацоўніцтве.
Беларускі кіраўнік зазначыў, што бакі таксама выйшлі на новыя кірункі супрацоўніцтва ў сферы інфармацыйных, нана- і біятэхналогій, ваенна-прамысловага комплексу, навуковых даследаванняў.
Каментары