Аляксандр Лукашэнка запрашае прадстаўнікоў еўрапейскіх дзелавых колаў да рэалізацыі інвестпраектаў у Беларусі. З такой прапановай кіраўнік дзяржавы выступіў сёння на сустрэчы з прадстаўнікамі дзелавых колаў Швейцарыі.
Аляксандр Лукашэнка падкрэсліў, што прыцягненне замежных інвестыцый на базе самых сучасных тэхналогій - адзін з важнейшых напрамкаў эканамічнай палітыкі беларускай дзяржавы. «У нас ёсць шмат перспектыўных інвестыцыйных праектаў, якія мы зацікаўлены рэалізаваць з удзелам замежнага капіталу. У першую чаргу гэта датычыцца фармацэўтычнай прамысловасці, хімічнай вытворчасці, іншых сфер дзейнасці, у тым ліку тых, якія вы тут прадстаўляеце», - сказаў кіраўнік дзяржавы, звяртаючыся да бізнесменаў.
Лукашэнка выказаў надзею, што гэта размова выльецца ў новыя канкрэтныя напрамкі супрацоўніцтва Беларусі з партнёрамі са Швейцарыі, Германіі, Польшчы або любой іншай краіны свету.
Звяртаючыся да старшыні наглядальнага савета, генеральнага дырэктара кампаніі «Штадлер Рэйл Груп» Петэра Шпулера, які ўзначальвае дэлегацыю прадстаўнікоў дзелавых колаў Швейцарыі, што прыбыла ў Беларусь, Аляксандр Лукашэнка выказаў надзею, што паспяховая работа «Штадлер Рэйл Груп» у Беларусі паслужыць добрым прыкладам для прыходу сюды буйных кампаній.
Лукашэнка нагадаў, што галоўным сведчаннем плённага супрацоўніцтва з гэтай кампаніяй з'яўляецца рэалізуемы ў Фаніпалі праект будаўніцтва завода па вытворчасці чыгуначнага і гарадскога электратранспарту. Паводле слоў кіраўніка дзяржавы, усяго каля двух гадоў спатрэбілася для таго, каб практычна з нуля пабудаваць адзін з самых сучасных заводаў па выпуску чыгуначнага пасажырскага транспарту на тэрыторыі СНД. «Нядаўна я падпісаў указ, у адпаведнасці з якім Фаніпалю надаецца статус горада-спадарожніка Мінска. Я ўпэўнены, што гэты факт пазітыўна паўплывае і нашу з вамі агульную справу», - сказаў кіраўнік дзяржавы, звяртаючыся да Петэра Шпулера.
Аляксандр Лукашэнка падкрэсліў, што гатовы выслухаць прапановы па развіцці супрацоўніцтва ў самых розных галінах.
Візіт у Беларусь прадстаўнікоў дзелавых колаў Швейцарыі праходзіць з 22 па 26 мая.
Каментары