Трагедыя здарылася 17 студзеня. Прыблізна ў 15.00 у Светлагорскі аддзел па надзвычайных сітуацыях ад работнікаў хуткай дапамогі паступіла паведамленне пра тое, што ў райцэнтры па вуліцы Савецкай непадалёк ад рымска-каталіцкага касцёла ў канале тоне дзіця.
Як паведамілі ў Гомельскім абласным упраўленні МНС, на месцы выкліку ратавальнікі выявілі за 10 метраў ад берага канала ў вадзе хлопчыка 2004 года нараджэння, вучня 3-га класа. У 15.12 работнікамі МНС сумесна з работнікамі светлагорскага «Асвода» пры дапамозе ратавальнай дошкі дзіця дасталі з вады ў беспрытомным стане, транспартавалі на бераг, перадалі брыгадзе хуткай медыцынскай дапамогі і даставілі ў бальніцу. Хлопчык памёр ад пераахаладжэння.
Паводле слоў работнікаў школы, з 13.00 хлопчык павінен быў знаходзіцца на вучобе, але ў школу не з'явіўся.
Прычыну адсутнасці ўстанаўліваюць супрацоўнікі РАУС. Акалічнасці гібелі высвятляюць і праводзяць расследаванне пракуратура і група Следчага камітэта. Інцыдэнт здарыўся на канале для забеспячэння вадой Светлагорскай ЦЭЦ, за 40 метраў ад месца яго ўпадання ў раку Бярэзіну.
Каментары