Viecier z poŭdnia

Pucin pieratvarajecca ŭ Meternicha XXI st., adnak sproba ekspartu dyktatury va Ŭkrainu pravaliłasia.

Staŭka na ŭkrainskich vybarach — bolš čym žyćcio. Pytańnie nia tolki ŭ tym, jaki z dvuch kandydytaŭ narešcie stanie prezydentam, navat nia ŭ tym, kudy — na Ŭschod ci Zachad — paviernie Ŭkraina. Sapraŭdnaja staŭka — nakolki daloka na postsavieckaj prastory raspaŭziecca aŭtarytarnaja zaraza. Stvorycca ci skanaje novy «śviatarny sajuz» na peryferyi eŭrapiejskaha kantynentu, suprać demakratyi i svabody. Rasieja, Biełaruś, Kazachstan… Jak i ŭ 1991 h., nie chapaje tolki Ŭkrainy. Jak i tady, jaje vybar vyrašalny.

Adabjecca heta chutka ci pozna, moža navat i pozna, ale abaviazkova na ŭsich. Biez Ukrainy Rasieja nie imperyja. Bieź jaje jana asudžana ruchacca da eŭrapiejskaj cyvilizacyi. Hetaja maksyma, vykazanaja daŭnym-daŭno Źbihnievam Bžazinskim, siońnia jašče bolš aktualnaja. Biezumoŭna, tym, chto staić na płoščach i majdanach u Kijevie, Lvovie, Charkavie, Bžazinski da adnaho miesca. Jany prosta chočuć bačyć svaju Baćkaŭščynu volnaj, biez prezydenta-zeka. Ale rečaisnaść zastajecca. Ukraina — heta los našaha rehijonu.

Kali ja pisaŭ hetyja radki, u Kijevie jašče ničoha nia vyrašyłasia. Moža, kamandzie Kučmy-Miedźviedčuka pad pseŭdanimam Janukovič jašče i ŭdasca zachavać uładu (što jany ź joj ciapier buduć rabić — heta inšaje pytańnie). Adnak adno ŭžo zrazumieła: Ukraina zrabiła vielizarny krok u Eŭropu. Nie ŭ sensie hieapalityki, a ŭ sensie taho, jakuju rolu ŭ jaje žyćci adyhryvaje narod, supolnaść hramadzianaŭ. Zdajecca, usio było suprać hetaha. Pry 13-pracentnym roście ekanomiki ŭrady zvyčajna nie prajhrajuć navat spraviadlivyja vybary. Hienerał Maroz (nie palityk, a pryrodnaja źjava) całkam na baku Janukoviča i K°. Amal poŭnaja niezacikaŭlenaść i nieprysutnaść Eŭropy. Zdajecca, dla ich mienš demakratyi va Ŭkrainie — mienš prablemaŭ z pašyreńniem EZ. Złučanyja Štaty ledź vyleźli z ułasnaha vybarčaha harmidaru. Armija łabistaŭ Janukoviča ŭ Vašynhtonie staranna apracoŭvała miascovych palisymejkieraŭ. Tamu ni ŭ Eŭropie, ni ŭ Amerycy nichto ničoha nie čakaŭ. Rasieja apałčyłasia, jak na toj «apošni i rašučy». Pucin kančatkova sarvaŭ masku, jakuju tak staranna napialiŭ 11 vieraśnia 2001 h. i dziakujučy jakoj, a taksama vysiłkam niekatorych našych analitykaŭ, dla jakich Maskva — heta dahetul pup suśvietu, bahata ŭ kaho stvaryłasia iluzija, što jon — naš paratunak.

Adkrytaje ŭmiašalnictva Pucina ŭ prezydenckuju kampaniju susiedniaj dziaržavy — heta nia tolki śviedčańnie taho, što rasiejski imperyjalizm jašče jaki žyvy. Heta sproba ekspartu dyktatury, pieranosu rasiejskaj madeli kiravańnia ŭžo niedemakratyi na krainy, jakija ź joj chočuć raźvitacca.

Poŭny varyjant artykułu hladzicie ŭ hazecie "Naša Niva".

Vital Silicki

• 0
• 0
• 0
• 0
• 0
• 0
• 0
• 0