U adroźnieńnie ad Eŭropy, u Amerycy viera čałavieka — zusim nie pryvatnaja sprava kožnaha, i tym bolš prezydenta. Ad kožnaha kandydata ŭ prezydenty Štataŭ čakajecca hłybokaja pavaha da viery svaich suhramadzian. A jany vierać u Boha i ŭ suśvietnuju misiju ZŠA, paklikanych raspaŭsiudzić amerykanskija kaštoŭnaści svabody i demakratyi na ŭvieś śviet. Vybar Džordža Ŭokiera Buša, sieradniaka va ŭsim, akramia pałymianaj viery ŭ Ameryku i jaje kaštoŭnaści, — heta vybar hramadzianami ZŠA mesijanskaj roli dla svajoj krainy.
Džordža Buša i amerykancaŭ nie zrazumieć biez pavarotnaj padziei najnoŭšaj historyi Štataŭ — ataki na Suśvietny handlovy centar. Jana stała vyznačalnaj nia tolki ŭ palityčnaj dziejnaści prezydenta, ale taksama dla jaho asabistych pohladaŭ i navat viery. 11 vieraśnia stała svojeasablivym dniom pieramianieńnia amerykanskaha mesijanizmu. Čas vybraŭ Buša, a Buš ubačyŭ svaju misiju nia tolki ŭ abaronie ŭłasnaj krainy ad teraryzmu, ale ŭ poŭnaj pieramozie nad suśvietnymi siłami zła. Vajna ŭ Iraku mieła dla amerykanskaha prezydenta pryncypovaje značeńnie.
Relihijnaść Džordža Buša supadaje z ahulnaj relihijnaściu amerykancaŭ. Jon źjaŭlajecca viernikam tradycyjnaj amerykanskaj Metadysckaj carkvy. U svajoj prahramie Buš zaŭsiody padkreślivaŭ, što źjaŭlajecca starońnikam mocnaj siamji, dyj sam jon nadziejny siemjanin. Sa svajoj žonkaj Łaŭraj jany razam užo 27 hadoŭ, majuć dźvie dački. Viadomaje nehatyŭnaje staŭleńnie Buša da homaseksualnych šlubaŭ. Ź inšaha boku, jon prychilnik śmiarotnaha pakarańnia. Jak hubernatar Techasu, Buš nie padpisaŭ nivodnaha pamiłavańnia, a ŭ štacie było vykanana najbolš śmiarotnych prysudaŭ u Amerycy. Bo Buš viedaje, što takoje dabro i što takoje zło, jon nie z eŭrapiejcaŭ i nia z postmadernistaŭ, dla jakich usio adnosna i niama absalutu, akramia čałaviečaha žyćcia. I Bušava dabro ličyć patrebnym zmahacca sa złom lubymi srodkami, u tym liku ahniom i miačom. Hetaje zmahańnie budzie ruchać suśvietnuju historyju nastupnyja čatyry hady. Za Bahdadam pryjdzie čarha Tehieranu, a mo i Pchieńjanu. Ameryka hatovaja nieści svaje kaštoŭnaści na ŭsie kantynenty. Jana vieryć u Buša i siabie.
Aleś Trafimienka, Mikoła Buhaj
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma33
Kamientary