Chronika falsyfikacyj

Pa studenckim bilecie

Na vybarčym učastku ŭ Maskvie na biełaruskim referendumie prahałasavaŭ rasiejski hramadzianin. Student zajaviŭ, što zhubiŭ pašpart, i pradjaviŭ studencki bilet. Pa hetym dakumencie jamu achvotna vydali biuleteń. Nasamreč hetaha chłopca, hramadzianina Rasiei, uziali z saboj biełaruskija studenty, jakija pastavili sabie na mecie vyjavić falsyfikacyi.

25% daterminovaha hałasavańnia pa krainie

Na akruzie S.Bahdankieviča (Miensk) u internacie Pedahahičnaha ŭniversytetu daterminova prahałasavali 66%. Kandydat U.Alaksiejenka (Viciebsk): akruha ŭklučaje ŭ siabie internaty Veterynarnaj akademii i Medyčnaha instytutu — daterminova prahałasavali kala 50%. U V.Smolnikavaj u Buda-Kašaloŭskim rajonie sielskija žychary, jakija prahałasavali daterminova, składajuć kala 70%. Dla čaho było zahaniać ludziej hałasavać daterminova?

Prahałasavała 140%

Na ŭčastku №510 Uschodniaj vybarčaj akruhi №107, dzie balatujecca Vincuk Viačorka, pavodle padlikaŭ naziralnikaŭ, jaŭka skłała blizu 140% ad kolkaści vybarščykaŭ u śpisach.

Fokusy na ŭčastkach

Padčas padliku hałasoŭ stosy ź biuleteniami «suprać» upichvalisia ŭ siaredzinu kipy «za». Naziralniki heta bačyli, ale niešta zrabić nia mieli prava. Siabar Partyi BNF Viktar Miaziak dyk naohuł paśla taho, jak usie biuleteni byli zašyty ŭ miech i apiačatany, znajšoŭ u šafcy ŭ kabincy dla hałasavańnia try biuleteni z paznakaj «za» dy zapytaŭsia ŭ staršyni kamisii, ci supadaje ŭ jaho «debet» z «kredytam». Tyja biuleteni byli adrazu ž zabranyja milicyjantami. Ničoha inšaha ŭ Baranavičach i nie čakali.

Akademik Vajtovič: Byli cyrkulary

«Pavodle źviestak, jakija my majem, na ŭsie vybarčyja ŭčastki Biełarusi pastupili cyrkulary ad vykanaŭčaj ułady pra nieabchodnyja vyniki hałasavańnia», — zajaviŭ akademik Alaksandar Vajtovič 19 kastryčnika ŭ Maskvie na pres-kanferencyi dla rasiejskich žurnalistaŭ. «Kali Rasieja budzie j nadalej padtrymlivać Alaksandra Łukašenku, heta, na vialiki žal, pryviadzie da nahniatańnia ŭ Biełarusi antyrasiejskich nastrojaŭ», — skazaŭ navukoviec.

Tut 1428 i tam 1428

— U niadzielu za dźvie hadziny pierad skančeńniem hałasavańnia ludzi z kamandy Vincuka Viačorki dali mnie atrymanyja ad niekaha ŭ kamisii budučyja vyniki vybaraŭ i referendumu na ŭčastku numar 495 akruhi №106 u Miensku, — raskazvaje Azhar Iškildzin, rasiejski žurnalist. — Ja pajechaŭ na hety ŭčastak i čakaŭ na abviaščeńnie vynikaŭ. A 21-j staršynia kamisii abvieściŭ, što ŭ referendumie ŭziało ŭdzieł 1428 čałaviek. Hladžu na kartku, a tam taksama 1428. Za — 1096 vybarcaŭ. U mianie taksama. Suprać — 224, i ŭ mianie 224. Vyniki vybaraŭ u parlament taksama amal idealna takija samyja. Roźnica tolki ŭ vyniku kandydata ad ŁDPB. Staršynia začytaŭ, što atrymaŭ jon 152 hałasy, a maja kartka abiacała 82. Ale staršynia paprasiŭ prabačeńnia za pamyłku i pračytaŭ, što ŭsio ž 82, — śmiajecca Iškildzin.

Praniało i Utu

Kiraŭnica rabočaj hrupy pa Biełarusi PA ABSE, viadomaja svajoj prymirenčaj da A.Łukašenki pazycyjaj, Uta Capf, jakaja prybyła ŭ Miensk u piatnicu ŭ jakaści aficyjnaj naziralnicy za vybarami ŭ Biełarusi, u časie sproby naviedać adzin ź miascovych vybarčych učastkaŭ była litaralna vykinutaja za dźviery staršynioj vybarkamu. Pra hety incydent spadarynia Capf paviedamiła pradstaŭnikam niamieckich ŚMI. Pavodle słovaŭ niamieckaj parlamentarki, jana i jaje kalehi, naziralniki ABSE, sutyknulisia ŭčora taksama i ź niežadańniem siabroŭ vybarkamaŭ adkazvać na ichnyja pytańni.

Całkam zadavolenyja vybarami byli tolki braty pa rozumie z SND i adzinkavyja naziralniki z zachodnich krainaŭ, zaprošanyja samimi ŭładami Biełarusi. Mienavita jany vystupali na BT.

Miž tym naziralniki ad Eŭraparlamentu Bohdan Klich i Barbara Kudrycka zajavili, što pastaviać pytańnie ab pašyreńni zabarony na ŭjezd u krainy Eŭropy dla siabroŭ Centralnaj vybarčaj kamisii i spn.Jarmošynaj.

Pavodle BiełaPAN, svaboda.org i ŭłasnych karespandentaŭ

• 0
• 0
• 0
• 0
• 0
• 0
• 0
• 0