Spartovyja pieramohi 2003

Moładź u finale

Sioleta naša moładzievaja futbolnaja zbornaja trapiła ŭ finał Čempijanatu Eŭropy. Uvajści ŭ vosiemku samych mocnych kamandaŭ, apiaredziŭšy takija futbolnyja superdziaržavy, jak Halandyja, Čechija, Hišpanija, Anhielščyna dy Francyja, — dla nas vialiki honar i vialikija perspektyvy adnačasova. Jość z kaho brać prykład «darosłaj» nacyjanalnaj zbornaj. Moładzievaje Eŭrapieršynstvo — heta najpierš vializny kirmaš, dzie kožny hulec, jaki dobra pakazaŭ siabie, moža być zaŭvažany hrandami suśvietnaha futbołu. Heta nie aktualna dla Alaksandra Hleba, jakoha i tak dobra viedajuć pa «Štutharcie», ale ž u nas jość takija fajnyja chłopcy, jak Juraś Žaŭnoŭ, Cimoch Kałačoŭ ci Aleh Škabara, jakija mohuć jašče padvučycca ŭ jakich italjanskich ci niamieckich klubach. Da taho ž turnir budzie adboram na Alimpijadu'2004 u Atenach. U našych chłopcaŭ niakiepskija šancy. Supierniki całkam prachadnyja: Švajcaryja, Charvatyja, Švecyja, Serbija i Čarnahoryja. Budziem čakać lutaha, kali stanie viadoma, z kim sustreniemsia na pieršaj stadyi, dy samoha pieršynstva, jakoje projdzie ŭ traŭni—červieni.

Pieršyja rakietki Eŭropy

Našaja mužčynskaja zbornaja pa nastolnym tenisie była najlepšaj na kamandnym čempijanacie Eŭropy. Dy jašče indyvidualnyja załatyja medali ŭ asabistym i parnym zaliku spartoŭcy ŭziali (Uładzimier Samsonaŭ i Jaŭhien Ščacinin adpaviedna). A voś na čempijanatach śvietu i Alimpijskich hulniach spravy ŭ Samsonava iduć nia tak hładka. Sioleta ŭ Paryžy na Čempijanacie śvietu naš lider vylecieŭ užo ŭ 1/8 finału. Da taho ž praz zaniataść Samsonava našaja kamanda ciapier zavalvaje adbor na nastupnaje pieršynstvo Eŭropy. Tamu alimpijskija perspektyvy acanić składana.

Tryjumf kidalnikaŭ

Try załatyja medali na Čempijanacie śvietu ŭ Paryžy — vidavočny pośpiech ajčynnaj škoły «karalevy sportu». Tym bolš pryjemna, kali heta adbyvajecca za hod da Alimpijskich hulniaŭ, a pieramohi takija pierakanaŭčyja. Jak zaŭsiody, pieramohi prynieśli nam pradstaŭniki kidalnaha sektaru (voś jano spradviečnaje biełaruskaje žadańnie adpravić usio jak maha dalej!): Andruś Michnievič (šturchańnie jadra), Ivan Cichan (kidańnie mołata) i Iryna Jatčanka (dysk). Ale spačyvać na laŭrach rana. Zhadajma 1995 hod, kali našyja lohkaatlety zaniali druhoje miesca ŭ ahulnakamandnym zaliku na Čempijanacie śvietu ŭ Hiotebarzie (Švecyja), ale na hulniach u Atlancie praz hod kolkaść medaloŭ rezka skaraciłasia. Dyj załatych siarod ich nie było.

Bijatlonnaja estafeta

Pieramoha našych mužčynaŭ-bijatlanistaŭ u estafecie na Kubku śvietu — istotnaje dasiahnieńnie. Apošnim časam biełaruskaja kamanda vystupaje paśpiachova, voś tolki pośpiechi hetyja zaviazanyja na asobach ludziej, jakija pierabiehli da nas ad susiedziaŭ. Damarosłych perspektyŭnych spartoŭcaŭ pakul nia bačna.

Kačar Salej i pinhvin Kalcoŭ

Hod adznačyŭsia vystupam našych chakieistaŭ u kamandach NCHŁ. Rusłan Salej — pieršy biełarus, jaki braŭ udzieł u finalnych hulniach Kubku Stenli i zakinuŭ tam šajbu. A małady Kanstancin Kalcoŭ zamacavaŭsia ŭ składzie klubu «Pittsburgh Penguins». U «pinhvinach» raniej hulaŭ lehiendarny Maryjo Lemje, ciapier jon adzin z uładalnikaŭ klubu. Kalcovu ž pakul zastajecca tolki raści dy nabiracca dośviedu, kab prademanstravać svaje zdolnaści ŭ nacyjanalnaj zbornaj.

Źmicier Kazłoŭski

• 0
• 0
• 0
• 0
• 0
• 0
• 0
• 0