Kolki zarablajuć spartoŭcy

Kolki zarablajuć spartoŭcy

Pryludnyja skarhi trenera Eduarda Małafiejeva na małyja hrošy (atrymlivaje jon kala 50 tys. dalaraŭ u hod) pryciahnuli ŭvahu da jašče słaba aśvietlenaj temy zarobkaŭ u biełaruskim sporcie.

Spartoŭcy-kamandniki (futbalisty, baskietbalisty i h.d.) atrymlivajuć hrošy ź biudžetu krainy tolki padčas navučańnia ŭ specyjalizavanych ustanovach. Hetaja stypendyja krychu bolšaja za studenckuju, pražyć na jaje naŭrad ci mahčyma. Tamu ŭsie navypieradki imknucca trapić u jakuju-niebudź prafesijnuju kamandu. Najbolš ciapier zarablajuć chakieisty. Dziakujučy “modzie” na chakiej, hety vid sportu maje realnuju sponsarskuju padtrymku. I najmacniejšyja kamandy Biełarusi, jak mienski “Kieramin” ci “Homiel”, mohuć trymać pry sabie jakasnych chakieistaŭ, płaciačy im kala tysiačy (a časam i bolej) dalaraŭ u miesiac. U kožnaha chakieista indyvidualny kantrakt, i sumy kantraktaŭ — tajamnica, ale siaredniaja — takaja. U inšych klubach, adpaviedna, mienšaja. Sponsar mahiloŭskaha chakiejnaha klubu — “Chimvałakno”, mienskaha — zavod pa vytvorčaści santechniki “Kieramin”. Navapołacki žyvie za košt “Palimiru”.

Našy futbalisty značna biadniejšyja. Na ŭzroŭni — barysaŭski BATE, dzie hulcy atrymlivajuć tuju ž siaredniuju tysiaču dalaraŭ, salihorski “Šachcior”, “Homiel”. Trymajucca kluby, što majuć narmalnych sponsaraŭ. Tak, “Mazyrski naftapierapracoŭčy zavod” padtrymlivaje “Słaviju”, zavod “Transmaš” — “Dniapro-Transmaš”, “Daryda” — adnajmiennuju kamandu, lidera pieršaha dyvizijonu. A voś u viciebskim “Lakamatyvie-96” na pačatku sezonu zarobak skłaŭ 86 tys. rubloŭ u miesiac.

Naŭprost ad dziaržavy atrymlivajuć hrošy tolki chakieisty-futbalisty zbornych, i to ŭ jakaści premijalnych za pośpiechi.

Niepasredna ž ź biudžetu krainy “ciahnuć” indyvidualniki — udzielniki zbornych pa alimpijskich vidach sportu. Vypłaty henyja zavucca alimpijskimi stypendyjami, suma zaležyć ad kolkaści zdabytaha spartoŭcam kaštoŭnaha metału i prestyžnaści vidu sportu ŭ krainie i ŭ śviecie.

Tak, stypendyja himnasta Ivana Ivankova ŭ 2001 h. składała 1200 dalaraŭ u miesiac, a čatyrochrazovy čempijon śvietu pa šaškach Anatol Hantvarh atrymlivaŭ 300 dalaraŭ. Usie inšyja sumy vahajucca miž hetymi dźviuma. Astatnija hrošy “na pražyćcio” spartoŭcy zarablajuć na raznastajnych kamercyjnych “Hran-pry” (lohkaja atletyka), etapach Kubku śvietu (łyžy, bijatlon). Vielmi važna ličycca perspektyŭnym spartoŭcam — mieć nadzieju trapić na bližejšaj Alimpijadzie ŭ vaśmiorku najlepšych. Inačaj ciabie dziaržava hetaj alimpijskaj stypendyi pazbavić. A prafesijna zajmacca sportam za svaje hrošy niemahčyma.

Alaksiej Šydłoŭski