Tak kazaŭ Łukašenka

Tak kazaŭ Łukašenka

Kronika vystupaŭ prezydenta pierad ŚMI — abiacańni, pahrozy, deklaracyi

12 lipienia 1994: mianie patopicie — sami patoniecie

Prezydent Biełarusi na pieršaj paśla abrańnia presavaj kanferencyi kaža: “Ad hetaha momantu presa moža ličyć siabie svabodnaj”, pryznaje nierealnaść adnaŭleńnia SSSR i źviartajecca da biznes-klasy: “Vy ź mianie vybivać reformy, licenzii i kvoty nia budziecie. Kali vy mianie patopicie, dyk i sami patoniecie”.

11 listapada 1994:
ceny na miesca!

Padčas adpačynku Łukašenki ŭ Sočy padvysilisia ceny. Prezydent, viarnuŭšysia, bačyć u hetym padkopy apanentaŭ. “Varta było vyjechać za miežy respubliki, jak niekamu było vyhadna ŭźniać ceny. Z paniadziełka ŭsie ceny pavinny być viernutyja na svaje miescy”. Kiraŭnik krainy źviartajecca da “tak zvanych kamersantaŭ”: “Chaču apošni raz papiaredzić pra toje, što vy prykładajecie vielmi šmat namahańniaŭ dla destabilizacyi ekanomiki Respubliki Biełarusi”. Łukašenka skardzicca žurnalistam: “Deputaty sprabujuć blakavać usie rašeńni prezydenta”. Adviarhajučy abvinavačańni ŭ aŭtarytaryźmie, jon zajaŭlaje: “My nikoli nia skocimsia da dyktatury”.

27 śniežnia 1994: iścinnaja mafija

Prezydent kaža pra ekanamičny prahres pad jaho kiraŭnictvam i razburalnuju dziejnaść BNF. “U historyju ja ŭvajdu takim, jakim mianie choča bačyć biełaruski narod… Iścinnaja mafija vyrašyła siońnia prybrać i Łukašenku, pieršaha biełaruskaha prezydenta, ad ułady. Nie atrymajecca, šanoŭnyja spadary! Pieršy biełaruski prezydent — usurjoz i nadoŭha”.

9 traŭnia 1995:
abiacaju kamunizm!

Nakonadni Dnia pieramohi prezydent sprabuje zavajavać sympatyi veteranaŭ: “Vy budavali kamunizm, i ja vam abiacaju: vy budziecie žyć pry kamuniźmie”.

20 listapada 1995: Respublika ŭ kolcy!

Prezydent zajaŭlaje, što Biełaruś stałasia “kamieniem spatyknieńnia miž roznymi dziaržavami. Respublika ŭziataja ŭ kolca zamiežnymi specsłužbami”. I ŭnutranyja vorahi źjadnalisia ŭ “baraćbie suprać prezydenta”. Jak zaŭždy, pieraškadžajuć i deputaty: “Dajcie narmalna pracavać. Pryvykli tut kryčać la mikrafona”.

23 studzienia 1996: kiraŭnikoŭ budu zdymać!

Prezydent vyznačyŭ štokvartalnyja pakaźniki dziejnaści pramysłovaści i abvieściŭ, što, kali niejkaje pradpryjemstva nia zmoža palepšyć vyniki svajoj pracy, kiraŭnik budzie źniaty z pasady. Pieršaj achviaraj robicca ministar pramysłovaści Kurankoŭ.

26 lutaha 1996:
nie zasłužyŭ, kab vykinuli

Paśla pahrozy strajku pradpryjemstvaŭ mikraelektroniki i mašynabudavańnia Łukašenka “tušyć pažar”. Zamiest mitynhavańnia rekamenduje rabočym pisać na adras Administracyi prezydenta listy: “Łukašenka, my tabie bolš nie daviarajem — dumaj, dzie ty budzieš pracavać zaŭtra”. Jon pryznajecca, što rabočyja pakryŭdzili jaho, bo “nie zasłužyŭ, kab mianie narod vykinuŭ jak skarystanuju anuču”. Čaho, maŭlaŭ, čakać ad jaho, jaki tolki “hod tamu pryniaŭ raźbituju, razvalenuju, prapituju, pradadzienuju dziaržavu”.

20 vieraśnia 1996:
ja prezydent!

Hałoŭnaja tema — padkopy niepryjaciela. Łukašenka vinavacić zamiežnych pasłoŭ u imknieńni “prynizić biełaruskaha prezydenta i ŭ procivahu padtrymać asobnych deputataŭ Viarchoŭnaha Savietu”.

11 sakavika 1997:
sajuz z Kitajem

III sesija mižparlamenckaha schodu supolnaści Biełarusi i Rasiei. Łukašenka abviaščaje, što krainy musiać terminova šukać recept procidziejańnia pašyreńniu NATO na ŭschod. Recept prosty: stvareńnie bloku Biełarusi, Rasiei j Kitaju. KNR i Rasieja paśla doŭha apraŭdvajucca pierad mižnarodnaj supolnaściu, što ŭ ich niama takich planaŭ.

23 traŭnia 1997: Biełaruś nia choča być pudziłam

Padpisańnie statutu sajuzu Biełarusi i Rasiei. Prezydent razvažaje: “Kožny blok pavinien razumieć, što, kali budzie ŭźnikać jakaja-niebudź pahroza, buduć i adekvatnyja dziejańni ź inšaha boku”. Paśla źmiakčajecca: “Biełaruś nia choča być pudziłam dla Eŭropy”.

7 kastryčnika 1997:
daju kryminalnikam
10 dzion

Zabojstva Mikałuckaha. “Jany doŭha padkradalisia da prezydenta — nie atrymałasia. Heta vyklik, vyklik hety ja prymaju. Ad siońniašniaha dnia na terytoryi našaj dziaržavy samaje drobnaje pravaparušeńnie ci złačynstva pavinna karacca nieadkładna. Ja chaču źviarnucca da kryminalnikaŭ: zapomnicie, panovie, ziamla budzie kurycca ŭ vas pad nahami. Ja papiaredžvaju ŭsich, chto rupicca na nivie biessaromnaj kamercyi i brudnych hrošaj: u vas 10 dzion, kab raźličycca. Praz 10 dzion my nia budziem šukać masy dokazaŭ”.

2 lutaha 1998:
sajuz ź Juhasłavijaj

Paśla pieramovaŭ u Białhradzie ab dałučeńni Juhasłavii da sajuzu Biełarusi i Rasiei A.Łukašenka paviedamlaje: “Toje, pra što my tut damovilisia, heta toje samaje, što my majem pamiž Biełarusiaj i Rasiejaj”.

23 lutaha 1998: voś vam zachodniaja demakratyja

Naviedaŭšy alimpijskaje Nahana, prezydent dzielicca ŭražańniami ad mižnarodnaha sportu: “Na svaje vočy bačyŭ hetuju žudasnuju niespraviadlivaść i mafijoznaść… Voś vam i słynnaja zachodniaja demakratyja, ja ŭ joj daŭno rasčaravaŭsia”.

20 sakavika 1998: vinavataja apazycyja

Padaje kurs rubla. Vinavataja, na dumku Łukašenki, apazycyja. “Ataka maskoŭskaha žulla i biełaruskich nacyjanał-radykałaŭ fašystoŭskaha tołku na ekanomiku Biełarusi pravaliłasia”. Dziejańni Nacbanku Łukašenka ličyć “hałavaciapstvam i dzikim nieprafesijanalizmam”. Paśla abiedu prezydent vydalaje z zali presu i zastajecca sam-nasam z bankirami. Paśla adnoj z replikaŭ staršyni Nacbanku Alejnikava jon zahadvaje jamu pajści ŭ adstaŭku, śledam pazbylisia pasadaŭ jašče troje.

28 traŭnia 1998:
Biełaruś našpihavanaja

A.Łukašenka kaža, što ź jahonaj inicyjatyvy kiraŭnictva Rasiei budzie pradstaŭlać biełaruskija intaresy na pieramovach z NATO. Rasiei, pavodle jahonych słovaŭ, pašancavała z chaŭruśnikam, bo “Biełaruś našpihavanaja sučasnaj vytvorčaściu”.

15 lipienia 1998:
śviet nam vinavaty

Vizyt u Chojnicki, Naraŭlanski i Pietrykaŭski rajony. “Na naš žal i na vialikaje ščaście ŭsiaho čałaviectva, jana (Čarnobylskaja avaryja) adbyłasia ŭpieršyniu… Nia našyja biełarusy daviali jaje (ČAES) da taho, kab jana ŭzarvałasia… U cyvilizavanym, sapraŭdy demakratyčnym śviecie pavinna być normaj humannaje staŭleńnie da paciarpiełaha nie pa svajoj vinie… My majem prava patrabavać sotni miljonaŭ dalaraŭ… Mižnarodnaja supolnaść abaviazanaja minimalizavać nastupstvy avaryi”.

17 lipienia 1998:
zmova Zachadu i apazycyi

“Mižnarodnaja izalacyja Biełarusi — častka bujnamaštabnaj zmovy Zachadu, rasiejskaj aliharchii i apazycyi”. Biełaruski kiraŭnik buduje łancužok: aryšt Šaramieta — vysialeńnie dyplamataŭ — akcyja pratestu prafsajuzaŭ.

22 lutaha 1999:
ratujem planetu

Padčas sustrečy z uschodnimi žurnalistami ahučvajecca zajava ab mahčymaści stvareńnia “mahutnaha centru — vajenna-palityčnaha i ekanamičnaha”, kudy aproč Rasiei i Biełarusi ŭvojduć Kitaj, Indyja i Iran. Palityki rehijonu pavinny zrazumieć, “što tolki jany mohuć stvaryć procivahu siońniašniamu bloku NATO i Amerycy. Heta patrebna nie dla taho, kab sašturchnuć dźvie systemy ŭ łob, a kab vyratavać cyvilizacyju, vyratavać planetu”. 24 lutaha 1999 h., napiaredadni sustrečy kiraŭnikoŭ dziaržaŭ — udzielnic mytnaha źviazu ŭ Maskvie, prezydent zajaŭlaje žurnalistam: “Jadravaja zbroja moža być viernutaja na terytoryju Biełarusi, nam treba dumać ab biaśpiecy našaj supolnaj Ajčyny”. Da hetaha padšturchoŭvaje “nabližeńnie NATO”.

10 krasavika 1999: selektarnyja narady

A.Łukašenka pravodzić samuju maštabnuju selektarnuju naradu časoŭ svajho kiravańnia. “Pasiaŭnaja — sprava nia tolki ekanamičnaja, ale i palityčnaja. Ubaku ad pasiaŭnoj nie pavinien zastacca nichto”. Vykanać zadaču kiraŭnik krainy zahadvaje “lubymi, u tym liku i niedemakratyčnymi metadami. Biełaruś pavinna całkam zabiaśpiečyć siabie chlebam”.

12 krasavika 1999:
na Zachadzie ŭsie pracujuć z ranicy da nočy, a kali tolki i da abiedu, dyk tam ža jość vynik

Nieŭzabavie skančajucca paŭnamoctvy Łukašenki pavodle Kanstytucyi 1994 h. Hanarycca asabliva niama čym, ale tłumačeńnie prezydent znachodzić: ministram pieraškadžaje apazycyja. I naahuł: “Narod u nas dziŭny — usie chočuć rynku, ale nichto nia viedaje, jakoha. Mabyć, chočuć rynku, kab nie pracavać i žyć dobra, jak na Zachadzie. Ale na Zachadzie ŭsie pracujuć z ranicy da nočy, a kali tolki i da abiedu, dyk tam ža jość vynik. Treba rastłumačyć, što niebahata žyviom, ale vinavata heta, heta i heta. Ale ž my ničoha nia ŭkrali, vajnu nie raźviazali, krainu nie padzialili”. Pry kancy Łukašenka źviartajecca da ABSE: “Chiba vam patrebnaja niestabilnaja kraina pasiarod Eŭropy, našpihavanaja zbrojaj?”

18 kastryčnika 2000:
Nie było patreby falšavać

Prezydent davodzić sapraŭdnaść nikim nie pryznanych parlamenckich vybaraŭ: “Nie było nijakaj patreby falsyfikavać vybary”.