Biełaruś praz 100 hadoŭ
Ouverture
U 2101 h. u adnym tolki Miensku budzie dziasiatak bujnych kancertnych zalaŭ. Kancerty buduć adbyvacca taksama ŭ kaściołach: Čyrvonym, Katedralnym, Śviatoj Trojcy i ŭ novych, pabudavanych u XXI st., ale ŭ kaściołach buduć vykonvać usio bolš duchoŭnuju, relihijnuju muzyku. Pačuć tvory Skrjabina albo Šastakoviča na Załatoj Horcy budzie niemahčyma. Na toje buduć šmatlikija FM-stancyi dy śvieckija zali. Kružełki z tvorami buduć pradavacca va ŭsich bujnych kniharniach-dyskarniach: knihi i dyski buduć pradavacca ŭ tych samych kramach.
Dziakujučy rašučamu prahresu transpartnych srodkaŭ, nie prablemaju budzie muzyku z Amsterdamu abo Kairu pryjechać u Miensk ci Niaśviž na adzin viečar, vystupić i ŭ hety ž dzień viarnucca dadomu. Jak i ciapier, žyvyja vystupy buduć nadzvyčaj papularnyja.
Chory Rachmaninava, Taniejeva, Bierazoŭskaha i mnohich inšych kampazytaraŭ buduć hučać u pravasłaŭnych saborach. Pravasłaŭnyja pad toj čas dapuściać vykarystańnie muzyčnych instrumentaŭ na carkoŭnaj słužbie, i ŭ carkvie možna budzie pačuć skrypku, haboj, arhan. A ŭ pratestanckich chramach niaredka možna budzie pačuć udarnuju ŭstanoŭku, syntezatar dy bas-hitaru.
U abjadnanaj Eŭropie moładź z usich krajoŭ počastu budzie vučycca ŭ inšych krainach. U Biełarusi na bazie kolišnich vučelniaŭ pracavaćmuć Kanservatoryi j Akademii muzyki, adčyniacca pryvatnyja škołki. Nia dzivam budzie ŭbačyć hišpanskaha studenta na ŭroku altysta Abrama Michielsona ŭ Babrujsku albo junuju flejtystku Alesiu Śpirydovič na zaniatkach fizkultury paryskaje Akademii muzyki. Ludzi buduć zaniatyja pieravažna ŭ sferach absłuhoŭvańnia j kultury, tamu kolkaść mastakoŭ, piśmieńnikaŭ, muzykaŭ za stahodździe značna pavialičycca.
Rej u Biełarusi budzie vieści pijanistyčnaja škoła, na vysokim uzroŭni budzie charavaja j falklornaja muzyka. Asablivuju papularnaść nabudzie novaja maniera vykanalnictva — adlustroŭvańnie stylu vialikich muzykaŭ minuŭščyny. Pijanisty “pad Kiempfa”, “pad Safranickaha”, “pad Arhieryč”, skrypačy “pad Muter”, “pad Ojstracha”, cymbalisty “pad Lavončyka” buduć davać cełyja kancerty, udajučy vykanańni lehiendarnych muzykaŭ i padbirajučy repertuar, ułaścivy tamu ci inšamu pratatypu.
Muzyka, paezija, vyjaŭlenčaje j dramatyčnaje mastactvy jašče ščylniej stanuć uzajemadziejničać dy ŭpłyvać adno na adnaho. Heta budzie čas syntezu kulturaŭ, žanraŭ, halinaŭ mastactva.
Vital Stachijevič
Novy prajekt “Našaje Nivy”
2101 hod. Jakoj budzie Biełaruś praz 100 hadoŭ? Jakoj budzie dziaržava i jaki dziaržaŭny ład? Jakimi buduć harady? Jaki horad budzie stalicaj Biełarusi? Jakimi miežy krainy? Što biełarusy buduć jeści? Jakimi buduć biełaruskija hrošy? Jakim transpart? Jakimi srodki masavaj infarmacyi? Jakaja litaratura budzie čytacca? Ci zastanucca teatry? Jakija imiony buduć samymi papularnymi? Jakimi stanuć lasy i reki? Ci možna budzie kupacca ŭ zabrudžanych siońnia aziorach? Jakija źviary źniknuć, jakija novyja raśliny zaviaducca? Što budzie z čarnobylskaj zonaj? U jakich cerkvach buduć malicca ludzi? Što jany viedaćmuć pra 2001 hod? Što budzie z nami?
Štotydnia — fantazii pra budučyniu Viečnaj Biełarusi, ese, prahnozy i futuralahičnyja artykuły ŭ rubrycy “Biełaruś praz 100 hadoŭ”. Z hetaha vyjdzie cełaja kniha! Čakajem Vašych dopisaŭ. Budziem zahadvać.
Kamientary