Haradzienskaja haradzkaja Rada Tavarystva Biełaruskaj Movy imia F. Skaryny parazumiełasia z adździełam adukacyi Haradzienskaha harvykankamu ab farmavańni ŭ navučalnym 2007‑2008 hh. u šerahu haradzkich škołaŭ pieršych klasaŭ ź biełaruskaj movaj navučańnia. Biełaruskija klasy majuć adčynicca ŭ himnazijach №№ 4,6,7, a taksama ŭ siarednich škołach №№ 10, 26, 32 Horadni.
Staršynia haradzkoj rady TBM prafesar Alaksiej Piatkievič raspavioŭ, što ciapier usio zaležyć ad taho, ci dojdzie hetaja infarmacyja da baćkoŭ: «U minułym hodzie taksama była dasiahnutaja padobnaja damoŭlenaść, adnak pry hetym była padadzienaja tolki adna zajava ad baćkoŭ».
Pavodle słovaŭ sp. Piatkieviča, hetym razam sytuacyju buduć vypraŭlać praź infarmavańnie baćkoŭ praz presu — planujecca zadziejničać haradzienskija internet‑sajty, niezaležnyja ŚMI. Sprava, adnak nia tolki ŭ adsutnaści infarmacyi, zaznačaje staršynia haradzkoj rady. «Raniej u nas była ahitacyjnaja hrupa kolkaściu 60 čałaviek, i my abychodzili praktyčna ŭsie siemji, u jakich dzieci rychtavalisia iści ŭ škołu» — uzhadvaje A. Piatkievič. Ciapier niama ni takoj kolkaści ludziej, dy j baćki ŭžo ŭsio bolš naściarožanyja da biełaruskaj movy, jakaja, na ich dumku, nie harantuje ich dzieciam dobraj karjery ŭ budučyni. Tym nie mienš ahitavać za biełaruskamoŭnaje navučańnie haradzienskija siabry TBM buduć. «Budziem naviedvać škoły akurat tady, kali baćki pačnuć prynosić zajavy» — kaža Alaksiej Piatkievič.
Na siońnia ŭ Horadni praktyčna nie zastałosia biełaruskamoŭnych klasaŭ. Sioleta dyplomy atrymajuć adzinaccaciklaśniki, što niekali pajšli vučycca ŭ klasy ź biełaruskamoŭnym navučańniem. Užo kolki hod idzie nabor u pieršyja klasy tolki z rasiejskaj movaj.
Ciapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar5
Kamientary