Pieradadzienyja žurnalistami podpisy za spynieńnie pieraśledu kalehi jana pieradała ŭ KDB.
HA «Biełaruskaja asacyjacyja žurnalistaŭ» atrymała pieršy adkaz na podpisy, sabranyja za spynieńnie kryminalnaj spravy suprać žurnalista.
Nahadajem, što padpisnaja kampanija ŭ abaronu Antona Surapina prachodziła pa inicyjatyvie žurnalisckaj arhanizacyi z 14 žniŭnia pa 13 vieraśnia biahučaha hodu. Naprykancy kampanii sabranyja podpisy byli adasłanyja ŭ Kamitet dziaržaŭnaj biaśpieki Biełarusi, a taksama Hienieralnuju prakuraturu.
26 vieraśnia HA «Biełaruskaja asacyjacyja žurnalistaŭ» atrymała pieršy adkaz na pieradadzienyja zvaroty. Hienieralnaja prakuratura Biełarusi za podpisam namieśnika načalnika adździeła D.S.Čarkasa paviedamiła žurnalisckaj arhanizacyi, što svoj ekziemplar podpisaŭ jana taksama pieradaje ŭ KDB.
Takim čynam rašeńnie ab spynieńni kryminalnaha pieraśledu žurnalista ciapier całkam znachodzicca ŭ rukach arhanizacyi, jakaja hety pieraśled raspačała.
Padpisnuju kampaniju ŭ abaronu źniavolenaha Antona Surapina HA «Biełaruskaja asacyjacyja žurnalistaŭ» raspačała 14 žniŭnia. Za try dni ŭ padtrymku žurnalista i stvaralnika sajtu bnp.by adhuknulisia dziasiatki hałoŭnych redaktaraŭ biełaruskich i zamiežnych vydańniaŭ, viadomyja miedyjapiersony, siabry HA «BAŽ», a taksama prosta nieabyjakavyja ludzi.
17 žniŭnia, praz try dni paśla pačatku kampanii, śledčyja KDB pryniali rašeńnie vyzvalić fatohrafa ź SIZA KDB pad padpisku ab niavyjedzie. Tym nie mienš, zbor podpisaŭ byŭ praciahnuty — ciapier užo za spynieńnie kryminalnaha pieraśledu žurnalista.
Kamientary