Žurnalistam nie zabaraniajecca znachodzicca ŭ miescach praviadzieńnia jak sankcyjanavanych, tak i niesankcyjanavanych akcyj, a supracoŭniki milicyi musiać być «dobrazyčlivymi, vietlivymi i ŭvažlivymi».
Pradstaŭnikam ŚMI ŭ suviazi z vykanańniem imi prafiesijnych abaviazkaŭ nie zabaraniajecca znachodzicca ŭ miescach praviadzieńnia jak sankcyjanavanych, tak i niesankcyjanavanych akcyj, — zajaŭlajecca ŭ liście Ministerstva ŭnutranych spraŭ Biełarusi, jaki atrymaŭ 9 krasavika BAŽ u adkaz na svajo piśmovaje patrabavańnie vykonvać zakon ab ŚMI.
Pad čas achovy paradku pry praviadzieńni masavych mierapryjemstvaŭ dziejańni milicyjantaŭ nie źviernutyja na ŭščamleńnie albo parušeńnie pravoŭ žurnalistaŭ, a nakiravany na zabieśpiačeńnie biaśpieki, papiaredžańnie i spynieńnie pravaparušeńniaŭ, — śćviardžajecca ŭ adkazie za podpisam namieśnika načalnika hałoŭnaha ŭpraŭleńnia milicyi hramadskaj biaśpieki i śpiecyjalnaj milicyi — načalnika ŭpraŭleńnia achovy pravaparadku A. Barsukova.
Jak paviedamlaje milicejski načalnik, ŭzmocniena patrabavańnie da supracoŭnikaŭ milicyi być «dobrazyčlivymi, vietlivymi i ŭvažlivymi». A «ŭ vypadku ŭźniknieńnia kanfliktnych situacyj pamiž žurnalistami i pradstaŭnikami pravaachoŭnych orhanaŭ padčas praviadzieńnia masavych mierapryjemstvaŭ, zaŭsiody isnuje mahčymaść urehulavać sprečnyja pytańni z adkaznaj asobaj orhanaŭ unutranych spraŭ».
Nahadajem, napiaredadni zapłanavanaj na 25 sakavika masavaj demanstracyi — Dnia Voli, BAŽ nakiravaŭ listy ministru ŭnutranych spraŭ Biełarusi Uładzimiru Navumavu i načalniku ŭpraŭleńnia ŭnutranych spraŭ Minskaha harvykankama Anatolu Kulašovu, dzie, spasyłajučysia na biełaruskaje zakanadaŭstva ab ŚMI, patrabavaŭ nie pieraškadžać žurnalistam pracavać u chodzie padobnych akcyj, paviedamlaje Pres‑słužba Biełaruskaj asacyjacyi žurnalistaŭ.
Kamientary