AHP zaklikaje Łukašenku admianić cenzuru vystupaŭ kandydataŭ
I adpravić Jarmošynu na zasłužany adpačynak.
Abjadnanaja hramadzianskaja partyja (AHP) zaklikaje Alaksandra Łukašenku admianić cenzuru vystupleńniaŭ kandydataŭ u deputaty i adpravić kiraŭnika CVK Lidziju Jarmošynu "na zasłužany adpačynak". Takaja sutnaść adkrytaha lista na imia kiraŭnika dziaržavy, paviedamiŭ žurnalistam 29 žniŭnia ŭ Minsku lidar AHP Anatol Labiedźka.
Nahodaj dla lista stała zabarona na tranślacyju pa telebačańni rolikaŭ kandydataŭ u deputaty ad AHP, jakija zaklikajuć da bajkotu parłamienckich vybaraŭ.
Labiedźka padkreśliŭ, što adozva adrasavanaja mienavita Łukašenku, a nie CVK, bo, pavodle jaho słoŭ, "scenaryi ŭsich vybarčych kampanij pišucca ŭ "Čyrvonym domie".
U liście havorycca ab tym, što "vybarčaja kampanija jašče nie padyšła i da ekvatara, a ŭžo zachłynajecca ad skandałaŭ", što ŭ krainie sistematyčna parušajecca Kanstytucyja. "Ciapierašniaja vybarčaja kampanija nie dazvalaje hramadzianam vykazać svajo volevyjaŭleńnie šlacham vybaru samych hodnych kandydataŭ u hałoŭny zakanadaŭčy orhan krainy. Pradstaŭnikam AHP, naprykład, nie dajuć mahčymaści vystupić pierad hramadzianami ni pa radyjo, ni pa telebačańni. Im stavicca ŭ vinu toje, što jany prapahandujuć bajkot vybaraŭ", — pišuć aŭtary.
AHP zaklikaje Łukašenku ŭstaranić dvajnyja standarty i nahadvajuć kiraŭniku dziaržavy jaho ž słovy: "Ja ni za kaho nie budu hałasavać, usio adno padmanuć, ja nie pajdu hałasavać".Takuju zajavu Łukašenka zrabiŭ u teleefiry 20 krasavika 1995 hoda.
"Čamu ž nam u 2012 hodzie nie dazvalajuć paŭtaryć hetyja ž słovy?" — pacikaviŭsia Anatol Labiedźka.
AHP taksama prosić kiraŭnika dziaržavy rastłumačyć, čamu fraza z ahitacyjnych rolikaŭ kandydataŭ "Łukašenka i jaho sistema — heta tupik" traplaje pad cenzuru."Heta ž nie abraza, a pytańnie dla abmierkavańnia, i ŭ nas jość fakty, jakimi my možam jaje abhruntavać", — padkreśliŭ lidar partyi.
Jon paviedamiŭ, što ŭ liście ŭtrymlivajecca prośba "ŭździejničać na spadaryniu Jarmošynu i skazać joj, kab jana nie zachaplałasia žanhlavańniem ličbaŭ". "Dyj naohuł, było b łahičnym adpravić jaje na zasłužany adpačynak. Svoj uniosak va ŭdaskanaleńnie i raźvićcio vybarčaha pracesu ŭ Biełarusi jana zrabiła", — pracytavaŭ Labiedźka ŭryvak lista.
AHP źviarnułasia da niezaležnych ŚMI Biełarusi z prośbaj akazać infarmacyjnuju padtrymku tym kandydatam, čyje vystupleńni nie vypuściła ŭ efir cenzura.
Labiedźka taksama paviedamiŭ, što siońnia ŭ 19.00 u minskim mikrarajonie Viaśnianka, kala mahazina "Susiedzi", adbudziecca sustreča pradstaŭnikoŭ AHP z vybarščykami.
Ciapier čytajuć
Anžaliku Mielnikavu bačyli ŭ Minsku ŭ «Dana Mole»20
Kamientary