Treci siektar u Biełarusi praciahvaje pracavać, niahledziačy na surjoznyja prablemy
16 červienia ŭ Minsku prachodzić kanhres Asamblei niedziaržaŭnych arhanizacyj.
Stanovišča treciaha siektara ŭ Biełarusi zastajecca składanym, ale jon praciahvaje pracavać. Taki lejtmatyŭ vystupleńniaŭ, što prahučali 16 červienia na adkryćci kanhresa Asamblei niedziaržaŭnych arhanizacyj u Minsku.
Jak adznačyŭ kiraŭnik Rabočaj hrupy Asamblei NDA Siarhiej Mackievič, padčas pieryjadu adnosnaj libieralizacyi ŭ Biełarusi pierad prezidenckimi vybarami 2010 hoda pradstaŭniki treciaha siektara čakali ad ułady nie kaśmietyčnych, a realnych źmianieńniaŭ adnosna dziaržavy da NDA.
«Na žal, rečaisnaść stała jašče horšaj, čym čakała bolšaść z nas. My nie možam nie zaŭvažyć pamianšeńnie kolkaści aktyvistaŭ, jakija viaduć hramadskuju dziejnaść, ich aryšty i represii ŭ dačynieńni da ich. Namieśnik staršyni Asamblei NDA Aleś Bialacki znachodzicca ŭ turmie, i nadziej na palapšeńnie situacyi niama», — ličyć Mackievič.
U svaju čarhu kiraŭnik vykanaŭčaha biuro Asamblei NDA Siarhiej Lisičonak nahadaŭ: padčas minułaha kanhresa Asamblei NDA, u 2009 hodzie, aktyvisty niaŭradavych arhanizacyj «sumlenna vitali libieralizacyju». «Adnak jany ž akazalisia adnymi ź pieršych, chto trapiŭ pad represii za hetuju vieru ŭ libieralizacyju», — padkreśliŭ jon.
«Niahledziačy na toje, što ŭ Biełarusi aficyjna zarehistravana bolš čym 2 tysiačy niedziaržaŭnych arhanizacyj, nielha skazać, što hramadzianskaja supolnaść u krainie raźvivajecca i maje ŭmovy dla raźvićcia. Isnuje vialikaja kolkaść prablem jak na zakanadaŭčym uzroŭni, tak i na ŭzroŭni vykanańnia hetych zakonaŭ», — zajaviŭ Lisičonak.
Najpierš jon adznačyŭ zabaronu na pracu niezarehistravanych arhanizacyj i artykuł 193–1 Kryminalnaha kodeksa, jaki praduhledžvaje adkaznaść za dziejnaść ad imia takich arhanizacyj.
Akramia taho, pahoršyłasia zakanadaŭstva ŭ śfiery lehalnaj pracy arhanizacyj, ich rehistracyi, atrymańnia biazvypłatnaj dapamohi. «Možna napisać vialiki tom, pryśviečany tamu, jak možna palepšyć žyćcio hramadskich abjadnańniaŭ», — zaŭvažyŭ aktyvist.
Na fonie taho, što adbyvajecca, padkreśliŭ jon, Asambleja NDA jak była asacyjacyjaj niedziaržaŭnych arhanizacyj, tak i zastałasia joju. «Bolš za toje, my hanarymsia tym, što našy rady pašyrylisia: ciapier u Asambleju ŭvachodziać 302 niaŭradavyja arhanizacyi z usich rehijonaŭ Biełarusi z samym šyrokim śpiektram intaresaŭ i śfier dziejnaści — ad adukacyjnych da maładziožnych, ad ekałahičnych da arhanizacyj, jakija pracujuć u sacyjalnaj śfiery», — skazaŭ Lisičonak.
«Hałoŭnaje, niahledziačy na niespryjalnyja ŭmovy, u Biełarusi isnujuć tysiačy zarehistravanych i niezarehistravanych arhanizacyj, jakija praciahvajuć dziejničać», — padkreśliŭ jon.
Siomy
Delehaty ciapierašniaha kanhresa, jakija źjechalisia ŭ Minsk z roznych rehijonaŭ krainy, abmiarkujuć aktualnyja prablemy hramadzianskaj supolnaści i abiaruć kirujučyja orhany Asamblei NDA.
Kanhres mieŭsia prajści ŭ pačatku maja ŭ Minskim adukacyjnym centry, adnak za dzień da mierapryjemstva kiraŭnictva centra, u lik zasnavalnikaŭ jakoha ŭvachodzić Minharvykankam, admoviła arhanizataram u arendzie pamiaškańnia. U suviazi z hetym kanhres byŭ pieraniesieny na červień.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary